തൃശൂര്: തിരുവോണാഘോഷങ്ങളുടെ മുന്നൊരുക്കങ്ങളുടെ അന്തിമഘട്ടത്തിലേക്കൊരുങ്ങി ഗുരുവായൂര് ക്ഷേത്രം. ഓണക്കാലത്ത് ക്ഷേത്ര ദര്ശന സമയം ഒരു മണിക്കൂര് കൂട്ടാന് ദേവസ്വം ഭരണ സമിതി യോഗം തീരുമാനിച്ചു. തിരുവോണാഘോഷത്തിന്റെ ഭാഗമായുള്ള ഉത്രാടം കാഴ്ചക്കുല സമര്പ്പണം, ഗുരുവായൂരപ്പന് ഓണപ്പുടവ സമര്പ്പണം, വിശേഷാല് കാഴ്ച ശീവേലി ഉള്പ്പെടെയുള്ള ക്ഷേത്ര ചടങ്ങുകള്ക്കായി ഗുരുവായൂരില് ഒരുക്കങ്ങള് അവസാന ഘട്ടത്തിലാണ്.
ഓണപ്പുടവ സമര്പ്പണം
തിരുവോണ നാളില് (സെപ്റ്റംബര്) പതിവ് ക്ഷേത്ര ചടങ്ങുകള്ക്ക് പുറമെ വിശേഷാല് കാഴ്ച ശീവേലിയും മേളവും ഉണ്ടാകും. അന്ന് പുലര്ച്ചെ നാലരയ്ക്കാണ് ശ്രീ ഗുരുവായൂരപ്പന് ഓണപ്പുടവ സമര്പ്പണം. ക്ഷേത്രം ഊരാളന് ബ്രഹ്മശ്രീ മല്ലിശേരി പരമേശ്വരന് നമ്പൂതിരിപ്പാട് ആദ്യം ഓണപ്പുടവ സമര്പ്പിക്കും. തുടര്ന്ന് ദേവസ്വം ചെയര്മാനും ഭരണ സമിതി അംഗങ്ങളും ഭക്തരും ഓണപ്പുടവ സമര്പ്പിക്കും. ഉഷപൂജ വരെ ഭഗവാന് ഓണപ്പുടവ സമര്പ്പിക്കാം.
തിരുവോണം വിശേഷാല് പ്രസാദ ഊട്ട്
തിരുവോണത്തിന് പതിനായിരം പേര്ക്കുള്ള വിശേഷാല് പ്രസാദ ഊട്ട് രാവിലെ 9ന് തുടങ്ങും. പ്രസാദ ഊട്ടിനുള്ള വരി ഉച്ചയ്ക്ക് 2 മണിക്ക് അവസാനിപ്പിക്കും. കാളന്, ഓലന്, പപ്പടം, പച്ചക്കൂട്ട് കറി, പഴം പ്രഥമന്, മോര്, കായവറവ്, അച്ചാര്, പുളിഞ്ചി ഉള്പ്പെടെയുളള വിഭവങ്ങള് ഉണ്ടാകും. അന്ന ലക്ഷ്മി ഹാളിലും അതിനോട് ചേര്ന്ന പന്തലിലുമാണ് പ്രസാദ ഊട്ട്. അന്ന ലക്ഷ്മി ഹാളിലേക്കുള്ള ക്യൂ സംവിധാനം ക്ഷേത്രക്കുളത്തിന് വടക്ക് ഭാഗത്ത് ഒരുക്കും.
വിശേഷാല് കാഴ്ച ശീവേലി
രാവിലെ കാഴ്ചശീവേലിക്ക് രാജശേഖരന്, ചെന്താമരാക്ഷന്, ബല്റാം ഉച്ചതിരിഞ്ഞുള്ള ശീവേലിക്ക് ഇന്ദ്ര സെന്, വിനായകന്, പീതാംബരന് രാത്രി ശീവേലിക്ക് വിഷ്ണു,വിനായകന്, പീതാംബരന് എന്നീ ദേവസ്വം കൊമ്പന്മാര് കോലമേറ്റും. രാവിലത്തെ ശീവേലിക്ക് കോട്ടപ്പടി സന്തോഷ് മാരാരും ഉച്ച കഴിഞ്ഞുള്ള ശീവേലിക്ക് ഗുരുവായൂര് ശശിമാരാരും മേള പ്രമാണം വഹിക്കും.
തിരുവോണാഘോഷത്തിന് 21.96 ലക്ഷം രൂപ
2024 വര്ഷത്തെ തിരുവോണാഘോഷത്തിനായി 21,96000 രൂപയുടെ എസ്റ്റിമേറ്റിന് ദേവസ്വം ഭരണ സമിതി അംഗീകാരം നല്കി.
ഉത്രാടം കാഴ്ചക്കുല സമര്പ്പണം
ഉത്രാട ദിനത്തില് (സെപ്റ്റംബര് 14) രാവിലെ ശ്രീവേലിക്കു ശേഷമാണ് ഉത്രാടം കാഴ്ചക്കുല സമര്പ്പണം. സ്വര്ണക്കൊടി മരച്ചുവട്ടില് വെച്ചാണ് ചടങ്ങ്. ക്ഷേത്രം മേല്ശാന്തി ആദ്യം കാഴ്ചക്കുല സമര്പ്പിക്കും. തുടര്ന്ന് ദേവസ്വം ചെയര്മാനും ഭരണ സമിതി അംഗങ്ങളും കൊടിമര ചുവട്ടില് കാഴ്ചക്കുല സമര്പ്പിക്കാം. നാലമ്പലത്തിലേക്ക് പ്രവേശനമുണ്ടാകില്ല. ശ്രീ ഗുരുവായൂരപ്പന് കാഴ്ചക്കുല സമര്പ്പിക്കാനെത്തുന്ന ഭക്തര്ക്ക് കിഴക്കേ ഗോപുര കവാടം വഴി തെക്കേ നട തിടപ്പള്ളി വാതില് സമീപത്ത്കൂടി (ക്രൂവളത്തിന് സമീപം) വരിനില്ക്കാനും ഇരിക്കാനും സൗകര്യം ഒരുക്കും.
ദര്ശന സമയം ഒരു മണിക്കൂര് കൂട്ടി
ഓണനാളുകളില് ഗുരുവായൂരപ്പ ദര്ശനത്തിന് എത്തുന്ന ഭക്തരുടെ സൗകര്യാര്ത്ഥം സെപ്റ്റംബര് 14 മുതല് സെപ്റ്റംബര് 22 ഞായറാഴ്ച വരെ ദര്ശന സമയം ഒരു മണിക്കൂര് കൂട്ടി. ക്ഷേത്രം നട ഉച്ചയ്ക്ക് 3.30 ന് തുറക്കും. പൊതു അവധി ദിനങ്ങളായ സെപ്റ്റംബര് 14, 15, 16, 17, 21, 22 എന്നീ തീയതികളില് രാവിലെ 6 മുതല് ഉച്ചതിരിഞ്ഞ് 2 വരെ വി ഐ പി / സ്പെഷ്യല് ദര്ശന നിയന്ത്രണം ഉണ്ടാകും.
