തിരുവനന്തപുരം: ഗ്രാമീണ തൊഴിലുറപ്പ് പദ്ധതി തൊഴിലാളികള്ക്ക് ഓണം ഉത്സവബത്തയായി 1000 രൂപ വീതം ലഭിക്കുമെന്ന് സര്ക്കാര് അറിയിച്ചു. കഴിഞ്ഞ സാമ്പത്തിക വര്ഷം100 പ്രവൃത്തിദിനം പൂര്ത്തിയാക്കിയ 5.69 ലക്ഷം തൊഴിലാളികള്ക്കാണ് ഉത്സവബത്ത ലഭിക്കുക. അയ്യന്കാളി നഗര തൊഴിലുറപ്പ് പദ്ധതി തൊഴിലാളികള്ക്കും ഓണം പ്രമാണിച്ച് 1000 രൂപവീതം ഉത്സവബത്ത അനുവദിച്ചു. കഴിഞ്ഞ സാമ്പത്തിക വര്ഷം 100 ദിവസമെങ്കിലും തൊഴിലെടുത്ത 5929 തൊഴിലാളികള്ക്കാണ് ബത്ത ലഭിക്കുക.
കയര് മാറ്റ്സ് ആന്ഡ് മാറ്റിംഗ്സ് സംഘങ്ങള്, ഫോം മാറ്റിംഗ്സ് ഇന്ത്യ ലിമിറ്റഡ്, സംസ്ഥാന കയര് കോര്പറേഷന്, കയര്ഫെഡ് എന്നിവയ്ക്ക് സര്ക്കാര് അനുവദിച്ച 10 കോടി രൂപയുടെ ഗ്രാന്റ് ഇവയിലെ തൊഴിലാളികള്ക്ക് ഓണക്കാല ആനുകൂല്യങ്ങള് ഉറപ്പാക്കാന് സഹായിക്കും.
പരമ്പരാഗത കയര് ഉല്പന്നങ്ങള് ശേഖരിച്ചതിന്റെ വില വിതരണം ചെയ്യാനായി സംസ്ഥാന കയര് കോര്പറേഷന് സര്ക്കാര് 10 കോടി രൂപ അനുവദിച്ചത് ചെറുകിട സംഘങ്ങളുടെ ബോണസ് വിതരണത്തിന് സഹായമാകും.
പൂട്ടികിടക്കുന്ന സ്വകാര്യ കയര് വ്യവസായ സഹകരണ സംഘങ്ങളിലെ തൊഴിലാളികള്ക്ക് 2000 രൂപവീതം എക്സ്ഗ്രേഷ്യ ലഭിക്കും. 10,732 തൊഴിലാളികള്ക്ക് സഹായം കിട്ടും. 100 ക്വിന്റലിന് താഴെ കയര് പിരിച്ചിരുന്ന പൂട്ടിപ്പോയ സംഘങ്ങളിലെ തൊഴിലാളികള്ക്കാണ് ഓണക്കാല സഹായത്തിന് അര്ഹത.
ദേശീയ സമ്പാദ്യ പദ്ധതി ഏജന്റുമാര്ക്ക് പ്രതിഫലം നല്കാനായി 19.81 കോടി രുപ അനുവദിച്ചു. ഒമ്പതിനായിരത്തോളം ഏജന്റുമാര്ക്കാണ് ഒരു ഗഡു പ്രതിഫലം കിട്ടുക.
