തിരുവനന്തപുരം: വാട്ടര് അതോറിട്ടി പൈപ്പ് ലൈനുകളുടെ അറ്റകുറ്റപണികളെ തുടര്ന്ന് കുടിവെള്ളം നിലച്ച നഗരവാസികള്ക്ക് കുടിവെള്ളം വേണമെങ്കില് പണം നല്കണം. വാട്ടര് അതോറിട്ടി ഉദ്യോഗസ്ഥയുടെ ശബ്ദശകലങ്ങള് പുറത്തായി. പേരൂര്ക്കട തുരുത്തുംമൂല 32-ാം വാര്ഡ് വാസികള് വാട്ടര് അതോറിട്ടി കണ്ട്രോള്റൂമുമായി ബന്ധപ്പെട്ടപ്പോഴാണ് ഇത്തരത്തിലുള്ള വിവരം.
വാര്ഡുകളില് കുടിവെള്ളം എത്തിക്കാന് ആവശ്യത്തിന് ടാങ്കറുകളില്ല. കുടിവെളളം വേണമെങ്കില് ഇതു സംബന്ധിച്ച ആപ്ലിക്കേഷനില് രജിസ്റ്റര് ചെയ്ത് പണം അടച്ചാല് വെള്ളം ടാങ്കറുകളില് എത്തിക്കാം. അല്ലെങ്കില് വാര്ഡ് കൗണ്സിലറുമായി ബന്ധപ്പെട്ടാല് മാത്രമേ വെള്ളം ലഭിക്കാനുള്ള സാധ്യതയുള്ളൂവെന്നാണ് മറുപടി. കഴിഞ്ഞ നാല് ദിവസമായി വെള്ളം കിട്ടാത്തതിനെ തുടര്ന്ന് വാട്ടര് അതോറിട്ടി സെക്ഷന് ഓഫീസുമായി ബന്ധപ്പെട്ടപ്പോഴായിരുന്നു കണ്ട്രോള്റൂമുമായി ബന്ധപ്പെടാന് നമ്പര് ലഭിച്ചത്.
എന്നാല് തുരുത്തുംമൂല വാര്ഡില് കുടിവെള്ളം ടാങ്കറുകളിലെത്തിക്കാന് മേയര് ഉള്പ്പെടെയുള്ളവരുമായി ബന്ധപ്പെട്ടെങ്കിലും ഫലമുണ്ടായിട്ടില്ല. മേയര് ഫോണ് എടുക്കുന്നതുപോലുമില്ല. നിരന്തരം മൊബൈലില് ബന്ധപ്പെട്ടപ്പോള് മറ്റൊരാള് ഫോണ് എടുത്തിട്ട് കുറച്ച് കഴിഞ്ഞിട്ട് വിവരം നല്കാമെന്ന് പറഞ്ഞ് ഡിസ്കണക്ട് ചെയ്തു. ഇതുവരെ മേയര് തിരികെ ബന്ധപ്പെടാന് ശ്രമിക്കുകയോ കുടിവെളളം എത്തിക്കാനുള്ള സംവിധാനം ഒരുക്കുകയോ ചെയ്തിട്ടില്ലെന്ന് വാര്ഡ് കൗണ്സിലര് പറഞ്ഞു.
വാര്ഡിലെ ജനങ്ങള് കുടിവെള്ളമില്ലാതെ കടുത്ത പ്രതിസന്ധി നേരിടുമ്പോഴും നഗരത്തിലെ വന്കിട ഫ്ലാറ്റുകള്ക്കും മുന്തിയ കടകള്ക്കും യഥേഷ്ടം കുടിവെള്ളം എത്തിക്കാന് നഗരസഭയ്ക്ക് കഴിയുന്നുണ്ട്. എന്നാല് സാധാരണക്കാരായ ജനങ്ങള്ക്ക് വെള്ളം എത്തിക്കാന് ടാങ്കറുകളില്ലായെന്ന നിലപാടിലാണ് നഗരസഭ. എന്നാല് ജനങ്ങള് വെള്ളത്തിന് പണം നല്കിയാല് ഇല്ലാത്ത ടാങ്കറുകള് പ്രത്യക്ഷപ്പെടുകയും ചെയ്യും. കടുത്ത ദുരിതം ഉണ്ടാക്കി ജനങ്ങളില് നിന്ന് പണം പിഴിയുകയെന്ന അജണ്ടയാണ് നഗരസഭ നടപ്പിലാക്കുന്നതെന്ന് ആക്ഷേപമുണ്ട്.
