മൂവാറ്റുപുഴ: കേരള സംസ്ഥാന യൂത്ത് ബാസ്‌കറ്റ്‌ബോള്‍ ചാംപ്യന്‍ഷിപ്പില്‍ പെണ്‍കുട്ടികളുടെ വിഭാഗത്തില്‍ കോഴിക്കോടും ആണ്‍കുട്ടികളുടെ വിഭാഗത്തില്‍ തൃശ്ശൂരും ജേതാക്കളായി. ഫൈനലില്‍ കോഴിക്കോട് ആലപ്പുഴയെ 88-43ന് തോത്പിച്ചു. കോഴിക്കോടിന്റെ അര്‍ത്തിക 26 പോയിന്റോടെ ടോപ്പ് സ്‌കോററായി. ദിയ ബിജുവും(16) ക്ലൗഡിയയും (14) മികച്ച പ്രകടനം കാഴ്ചവച്ചു.
കോഴിക്കോടിനെ 74 -43 പരാജയപ്പെടുത്തിയാണ് തശ്ശൂര്‍ ജേതാക്കളായത്. തൃശ്ശൂരിനു വേണ്ടി അഭിഷേക് 26 പോയിന്റു നേടി. കേരള ബാസ്‌കറ്റ്‌ബോള്‍ അസോസിയേഷന്റെ ആഭിമുഖ്യത്തില്‍ ഇടുക്കി ജില്ലാ ബാസ്‌ക്കറ്റ് ബോള്‍ അസോസിയേഷനാണ് സംഘടിപ്പിച്ച ചാംപ്യഷിപ്പില്‍ കാര്‍മല്‍ സിഎംഐ പബ്ലിക് സ്‌കൂളിലാണ് മത്സരങ്ങള്‍ നടന്നത്. ലൂസേഴ്സ് ഫൈനലില്‍ ആണ്‍കുട്ടികളുടെ വിഭാഗത്തില്‍ കോട്ടയം ഇടുക്കിയെയും (76-66) പെണ്‍കുട്ടികളുടെ വിഭാഗത്തില്‍ തൃശൂര്‍ കൊല്ലത്തെയും (71-57) പരാജയപ്പെടുത്തി വെങ്കലം ഉറപ്പിച്ചു.
ആണ്‍കുട്ടികളുടെ വിഭാഗത്തില്‍ മികച്ച താരമായി അഭിഷേകിനേയും (തൃശൂര്‍) ഭാവി വാഗ്ദാനമായി കോഴിക്കോടിന്റെ മുഹമ്മദ് സിനാനേയും തെരഞ്ഞെടുത്തു. പെണ്‍കുട്ടികളുടെ വിഭാഗത്തില്‍ കോഴിക്കോടിന്റെ അര്‍ത്തിക മികച്ച താരമായി. ആലപ്പുഴയുടെ സുഭദ്ര ജയകുമാറാണ് ഭാവി വാഗ്ദാനം. ട്രോഫികളും മെഡലുംകളും മൂവാറ്റുപുഴ എംഎല്‍എ മാത്യു കുഴല്‍നാടന്‍ വിതരണം ചെയ്തു
