തിരുവനന്തപുരം :കെടിഡിസി ചെയര്മാന് പദവി രാജിവയ്ക്കില്ലെന്ന് സിപിഎം നേതാവ് പി കെ ശശി. പാര്ട്ടി നടപടി തനിക്കെതിരെ ഉണ്ടോ ഇല്ലയോ എന്ന് ഉത്തരവാദിത്തപ്പെട്ടവര് പറയുമെന്നും അദ്ദേഹം പറഞ്ഞു. രാജി വയ്ക്കാനല്ലല്ലോ ചെയര്മാന് സ്ഥാനത്ത് ഇരിക്കാനല്ലേ പാര്ട്ടി പറഞ്ഞതെന്നും അദ്ദേഹം മാധ്യമങ്ങളോട് പ്രതികരിച്ചു.
കെടിഡിസിയുമായി ബന്ധപ്പെട്ട ചില കാര്യങ്ങള് ചെയ്യാനാണ് ഇപ്പോള് തിരുവനന്തപുരത്ത് വന്നത്. ബാക്കിയെല്ലാം കല്പ്പിത കഥകളാണെന്നും അദ്ദേഹം കൂട്ടിച്ചേര്ത്തു.
പാര്ട്ടി ഓഫീസ് നിര്മ്മാണഫണ്ടില് നിന്നും സമ്മേളന ഫണ്ടില് നിന്നും 20 ലക്ഷം രൂപ പി കെ ശശി സ്വന്തം അക്കൗണ്ടിലേക്ക് മാറ്റിയതായി പുത്തലത്ത് ദിനേശന്റെ നേതൃത്വത്തിലുളള അന്വേഷണ കമ്മീഷന് കണ്ടെത്തിയിരുന്നു. ബിനാമി സ്വത്തുക്കള് സമ്പാദിച്ചതുമടക്കം കണ്ടെത്തി.
കമ്യൂണിസ്റ്റിന് നിരക്കാത്ത ജീവിതശൈലിയാണ് ശശിയുടേതെന്നാണ് അന്വേഷണ കമ്മീഷന്റെ കണ്ടെത്തല്. ജില്ലാ കമ്മിറ്റി യോഗത്തില് എന് എന് കൃഷ്ണദാസ് ഒഴികെ ആരും ശശിയെ പിന്തുണച്ചില്ല. സംസ്ഥാന സെക്രട്ടറി എം വി ഗോവിന്ദന് കൂടി പങ്കെടുത്ത യോഗത്തില് പി കെ ശശിയെ തെരഞ്ഞെടുത്ത എല്ലാ സ്ഥാനങ്ങളില് നിന്നും നീക്കാന് തീരുമാനിച്ചതായി വാര്ത്തയുണ്ടായിരുന്നു. എന്നാല് ശശി ജില്ലാ കമ്മറ്റി അംഗമായതിനാല് സംസ്ഥാന കമ്മറ്റിയാണ് നടപടി എടുക്കേണ്ടത്. തല്ക്കാലം നടപടി ഉണ്ടായിട്ടില്ല എന്നാണ് റിപ്പോര്ട്ട്.
