തിരുവനന്തപുരം: സിനിമയില്‍ പവര്‍ ഗ്രൂപ്പ് ഉള്ളതായി അറിയില്ലെന്ന് ഗതാഗത മന്ത്രി കെ ബി ഗണേഷ് കുമാര്‍. പല സിനിമകളില്‍ നിന്നും തന്നെയും ഒഴിവാക്കിയിട്ടുണ്ടെന്ന് പറഞ്ഞ ഗണേഷ് കുമാര്‍ ഹേമ കമ്മിറ്റി റിപ്പോര്‍ട്ട് പുറത്തു വന്നത് നല്ലതാണെന്നും അഭിപ്രായപ്പെട്ടു. ആത്മയുടെ പ്രസിഡന്റാണ് താനെന്നും ഒരു നടനെയും താന്‍ ഇടപെട്ട് വിലക്കിയിട്ടില്ലെന്നും അദ്ദേഹം പറഞ്ഞു.
പുരയ്ക്ക് തീ പിടിച്ചപ്പോള്‍ വാഴ വെട്ടാന്‍ നടക്കുകയാണ് ചിലര്‍. എല്ലാം ശരിയാണെന്ന് അഭിപ്രായമില്ല.ഒരുപാട് അസൗകര്യങ്ങള്‍ ഉണ്ടെന്നുള്ളത് വാസ്തവമാണ്. വിശ്രമിക്കാന്‍ സൗകര്യമില്ല, ശുചിമുറിയില്ല. സീനിയര്‍ നടികളുടെ കാരവന്‍ ഉപയോഗിക്കാന്‍ അനുവദിക്കുന്നില്ല. നിര്‍മ്മാതാക്കളുടെ സംഘടനയാണ് ഇതൊക്കെ ആലോചിക്കേണ്ടത്.
ഇപ്പോള്‍ പുറത്തു വന്ന ജസ്റ്റിസ് ഹേമ കമ്മിറ്റി റിപ്പോര്‍ട്ടില്‍ ഗതാഗത മന്ത്രിക്ക് കാര്യമില്ല. ബന്ധപ്പെട്ട നടപടികള്‍ സാംസ്‌കാരിക വകുപ്പ് മന്ത്രി സ്വീകരിച്ച് കൊളളും. തന്നോട് ആരും പരാതി പറഞ്ഞിട്ടില്ലെന്നും ഗണേഷ് കുമാര്‍ പറഞ്ഞു. പരാതി പറഞ്ഞാല്‍ അന്നേരം പ്രതികരിക്കുമെന്നും നമ്മള്‍ എന്തിനാണ് ആവശ്യമില്ലാത്ത കാര്യങ്ങള്‍ ഊഹിക്കുന്നതെന്നും മന്ത്രി ചോദിച്ചു.
അതേസമയം, ഹേമ കമ്മിറ്റി റിപ്പോര്‍ട്ട് പൂര്‍ണമായി പുറത്തുവിടാനല്ല ഡബ്ല്യുസിസി ആവശ്യപ്പെട്ടതെന്ന് നടിയും ഡബ്ല്യുസിസി അംഗവുമായ രേവതി പറഞ്ഞു. മൊഴി നല്‍കിയ സ്ത്രീകളും പുരുഷന്മാരുമായ എല്ലാവരുടേയും സ്വകാര്യത പൂര്‍ണമായി സംരക്ഷിക്കണമെന്നാണ് തങ്ങളുടെ ആഗ്രഹമെന്ന് രേവതി പറഞ്ഞു. സ്വകാര്യത മാനിക്കപ്പെടുമെന്ന് കരുതി തന്നെയാകും പലരും മൊഴി നല്‍കിയിട്ടുണ്ടാകുക.
തുടര്‍ നടപടികള്‍ സംബന്ധിച്ച് കൂടിയാലോചിച്ച ശേഷം തീരുമാനമെടുക്കേണ്ടതാണെന്ന് രേവതി പറഞ്ഞു. ഹേമ കമ്മിറ്റി റിപ്പോര്‍ട്ട് മലയാള സിനിമാ മേഖലയെക്കുറിച്ച് നടത്തിയ ഒരു പഠനത്തിന്റെ റിപ്പോര്‍ട്ടെന്ന നിലയ്‌ക്ക് കാണണം. ആര്‍ക്കെതിരെയും നിയമനടപടി സ്വീകരിക്കാനാകുമോയെന്ന് അറിയില്ല. ഭാവിയില്‍ എടുക്കേണ്ട മുന്‍കരുതലുകള്‍ ആലോചിക്കാന്‍ സഹായിക്കുന്ന പഠന റിപ്പോര്‍ട്ടായി ഇതിനെ പരിഗണിക്കണമെന്നും രേവതി കൂട്ടിച്ചേര്‍ത്തു.
അതേസമയം ഹേമ കമ്മിറ്റി റിപ്പോര്‍ട്ടില്‍ പരാതിയുമായി എത്തുന്നവരുടെ പരാതി പരിശോധിക്കാന്‍ പ്രത്യേക സംഘത്തെ നിയോഗിക്കുമെന്ന് മന്ത്രി സജി ചെറിയാന്‍ പറഞ്ഞു. നിയമ രംഗത്തെ പ്രമുഖരുമായി സംസാരിച്ച് ഭാവിയില്‍ എന്ത് ചെയ്യണമെന്ന് ധാരണ ഉണ്ടാക്കും. പരാതി ഉണ്ടെങ്കില്‍ കേസെടുക്കും. സര്‍ക്കാര്‍ സ്ത്രീ സമൂഹത്തിനൊപ്പമാണെന്നും മന്ത്രി പറഞ്ഞു.
