തൃശൂര്: വയനാട് ദുരന്തമുണ്ടായ സാഹചര്യത്തില് പുലിക്കളിയും കുമ്മാട്ടിയും ഒഴിവാക്കാനുള്ള തൃശൂര് കോര്പ്പറേഷന് തീരുമാനത്തിനെതിരെ ദേശക്കൂട്ടായ്മകള്. നാല് ലക്ഷത്തോളം രൂപ ചെലവിട്ട് ഒരുക്കങ്ങളായെന്ന് പുലിക്കളി സംഘങ്ങള് പറയുന്നു. കോര്പ്പറേഷന് തീരുമാനം ഏകപക്ഷീയമാണെന്ന് കുമ്മാട്ടി സംഘാടക സമിതിയും കുറ്റപ്പെടുത്തി.
നാലോണ നാളിലാണ് പുലിക്കളി നടത്തേണ്ടത്. പതിനൊന്ന് ദേശങ്ങളാണ് ഇക്കുറി പുലി ഒരുക്കങ്ങള് തുടങ്ങിയത്. ഒമ്പതെണ്ണം രജിസ്ട്രേഷന് നടത്തി. മുന്നൊരുക്കത്തിന് ഓരോ സംഘവും നാല് ലക്ഷത്തിലേറെ രൂപ ചെലവിട്ടു.
ആചാരത്തിന്റെ ഭാഗമാണ് ഉത്രാടം മുതല് നാലോണനാള് വരെ നടത്തുന്ന ദേശക്കുമ്മാട്ടി. ഇക്കൊല്ലവും കുമ്മാട്ടി നടത്തുമെന്ന് കുമ്മാട്ടി സംഘം അറിയിച്ചു. പ്രതിഷേധക്കാര് തിങ്കളാഴ്ച മേയറെയും കളക്ടറെയും കാണും.
