പെരുമ്പാവൂർ : അപരിചതമായ നമ്പറുകളിൽ നിന്ന് വരുന്ന വീഡിയോ ഓഡിയോ കോളുകൾ ശ്രദ്ധയോടെ കൈകാര്യം ചെയ്തില്ലെങ്കിൽ സമ്പാദ്യം മുഴുവൻ നഷ്ടമാകാം. മുന്നറിയിപ്പു നൽകുന്നത് എറണാകുളം റൂറൽ ജില്ലാ പോലീസ്. നിരവധി പേരാണ് കോൾ അറ്റൻ്റ് ചെയ്ത് തട്ടിപ്പിന് ഇരയായത്. +92 ൽ തുടങ്ങുന്ന നമ്പറുകളിൽ നിന്നാണ് മിയ്‌ക്കവാറും വിളി വരുന്നത്. ആപ്പു വഴി ക്രിയേറ്റ് ചെയ്ത നമ്പറുകളായിരിക്കും ഇത്. ഡി.പി ഇട്ടിരിക്കുന്നത് പോലീസ് ഉദ്യോഗസ്ഥരെന്ന് തോന്നിക്കുന്ന തരത്തിൽ യൂണിഫോം ധരിച്ച ഒരാളുടേതായിരിക്കും.
പരമാവധി അസ്വസ്ഥതയും ടെൻഷനും ജനിപ്പിച്ച് പണം കൈപ്പറ്റുകയാണ് ഇവരുടെ ലക്ഷ്യം. ഉദാഹരണമായി, എം.ബി.ബി.എസിന് പഠിക്കുന്ന പെൺകുട്ടിയുടെ പിതാവിനെ ഉയർന്ന അന്വേഷണ സംഘമാണെന്ന് പറഞ്ഞാണ് വിളിച്ചത്. മയക്ക് മരുന്ന് പിടികൂടിയെന്നും മകൾക്ക് മയക്കുമരുന്ന് സംഘവുമായി ബന്ധമുണ്ടെന്നും പറഞ്ഞു.
മകൾക്ക് ഫോൺ കൈമാറാമെന്ന് പറഞ്ഞ് വേറൊരാൾക്ക് കൊടുക്കും. ഫോണിൽ പെൺകുട്ടിയുടേത് എന്ന് തോന്നിപ്പിക്കുന്ന കരച്ചിൽ ശബ്ദം മാത്രം. ” പ്രതീതി ജനിപ്പിക്കാൻ ” വയർലസ് ശബ്ദം. നിയമപരമായ നടപടിക്രമങ്ങൾ തുടങ്ങിയട്ടില്ലെന്നും, വലിയൊരു തുക തന്നാൽ പെൺകുട്ടിയെ ഒഴിവാക്കാമെന്നും സംഘം പറയും. മറ്റൊന്നും ആലോചിക്കാനോ, ആരെങ്കിലുമായി ബന്ധപ്പെടാനോ അനുവദിക്കാതെ ‘പരമാവധി ടെൻഷനടിപ്പിക്കും.
ഒടുവിൽ തട്ടിപ്പ് സംഘം പറയുന്ന പണം നൽകുകയാണ് ചെയ്യുന്നത്. പിന്നീട് മകളെ വിളിക്കുമ്പോഴാണ് തട്ടിപ്പായിരുന്നു എന്ന് ബോധ്യമാകുന്നത്. നിങ്ങളുടെ പേരിൽ അകൗണ്ട് എടുത്തിട്ടുണ്ട് അതിലുടെ കോടികളുടെ കള്ളപ്പണ ഇടപാട് നടന്നിട്ടുണ്ട്, സിം എടുത്ത് രാജ്യദ്രോഹപ്രവർത്തനങ്ങൾക്ക് ഉപയോഗിച്ചതായി തെളിഞ്ഞിട്ടുണ്ട്, കൊറിയറിൽ മയക്കുമരുന്ന് പിടികൂടിയിട്ടുണ്ട്.
വിളിക്കാനുള്ള കാരണങ്ങൾ നിരവധിയാണ്. ചിലപ്പോൾ സെറ്റിട്ട കോടതി മുറിയും, ന്യായാധിപന്മാരേയും കാണിക്കും. വെർച്വൽ അറസ്റ്റാണെന്നു പറഞ്ഞ് പണം കിട്ടുന്നതു വരെ അനങ്ങാൻ സമ്മതിക്കില്ല. നിരവധി വ്യാജരേഖകളും കാണിക്കും. പലരും ഭയം കൊണ്ട് അവർ പറയുന്ന പല അക്കൗണ്ടുകളിലേക്കും പണം നിക്ഷേപിക്കും.
ഒരു നിയമസംവിധാനവും കേസുമായി ബന്ധപ്പെട്ട് അക്കൗണ്ടുകളിലേക്ക് പണം ‘നിക്ഷേപിക്കാൻ ആവശ്യപ്പെടില്ലെന്നും, വീഡിയോ കോൾ വഴി അറസ്റ്റ് ചെയ്യില്ലെന്നും റൂറൽ ജില്ലാ പോലീസ് മേധാവി വൈഭവ് സക്സേന പറഞ്ഞു. ഇത്തരം വിളികൾ വരുമ്പോൾ ജാഗ്രത പാലിക്കണമെന്നും എസ്.പി പറഞ്ഞു.
