ദുരഭിമാനക്കൊലയെ ന്യായീകരിച്ച് തമിഴ് നടനും സംവിധായകനുമായ രഞ്ജിത്ത്. ദുരഭിമാനക്കൊല അക്രമല്ല, മാതാപിതാക്കള്ക്ക് കുട്ടികളോടുള്ള കരുതലാണ് എന്നാണ് രഞ്ജിത്ത് പറയുന്നത്. പുതിയ സിനിമ ‘കവുണ്ടംപാളയം’ റിലീസ് ചെയ്തതിന് ശേഷം മാധ്യമങ്ങളോട് സംസാരിക്കവെയാണ് രഞ്ജിത്തിന്റെ വിവാദ പരാമര്ശം.
”മക്കള് പോകുന്നതിന്റെ വേദന മാതാപിതാക്കള്ക്ക് മാത്രമേ അറിയൂ. ഒരു ബൈക്ക് മോഷണം പോയാല്, എന്താണ് സംഭവിച്ചതെന്ന് നമ്മള് അന്വേഷിക്കില്ലേ. കുട്ടികള്ക്ക് വേണ്ടി ജീവിതം ഉഴിഞ്ഞു വയ്ക്കുന്ന മാതാപിതാക്കള് ദേഷ്യം പ്രകടിപ്പിക്കും. അത് അക്രമമല്ല. അവരോടുള്ള അവരുടെ കരുതല് മാത്രമാണ്” എന്നാണ് രഞ്ജിത്ത് പറയുന്നത്.
നടന്റെ ഈ പരാമര്ശത്തിനെതിരെ കടുത്ത വിമര്ശനമാണ് ഉയരുന്നത്. ദുരഭിമാനക്കൊലയ്ക്കെതിരെ പോരാടുന്ന വ്യക്തികളും സംഘടനകളും നടന്റെ പ്രസ്താവനയെ അപലപിച്ചു. ഇതാദ്യമായല്ല രഞ്ജിത്ത് വിവാദ പ്രസ്താവനകളുടെ പേരില് പ്രതിസന്ധിയിലാകുന്നത്.
നേരത്തെ, ഹാപ്പി സ്ട്രീറ്റിനെ കുറിച്ച് (ഒരു തെരുവില് നിരവധി ഷോകള് നടത്തുന്ന ഒരു പരിപാടി) സംസാരിച്ചപ്പോള് ചെറിയ വസ്ത്രം ധരിച്ച് സ്ത്രീകള് എല്ലാവരുടെയും മുന്നില് നൃത്തം ചെയ്യുന്നതിനെ മോശമായി ചിത്രീകരിക്കുന്ന പരാമര്ശം നടത്തി വിവാദം സൃഷ്ടിച്ചിരുന്നു.
രഞ്ജിത്ത് സംവിധാനം ചെയ്യുന്ന സിനിമകളിലും സ്ത്രീകളെ കേവലം വസ്തുക്കളായി മാത്രം കാണുന്ന പരാമര്ശങ്ങളുണ്ടെ് എന്ന ആക്ഷേപവും ഉയര്ന്നിരുന്നു. അതേസമയം, രാജമാണിക്യം, ചന്ദ്രോത്സവം എന്നീ സിനിമകളിലെ വില്ലന് വേഷങ്ങളിലൂടെ മലയാളത്തിലും അഭിനയിച്ചിട്ടുള്ള താരമാണ് രഞ്ജിത്ത്.
