ന്യൂഡൽഹി : ഇന്ത്യയിൽ നിന്ന് പണം തട്ടുന്ന ചൈനീസ് കമ്പനികൾക്കെതിരെ ശക്തമായ നടപടികളുമായി മോദി സർക്കാർ. അടുത്ത 3 മാസത്തിനുള്ളിൽ ഇത്തരത്തിലുള്ള 400 ചൈനീസ് കമ്പനികളെ വ്യവസ്ഥാപിതമായി നിരോധിക്കാനാണ് നീക്കം. . ഈ കമ്പനികൾ ഇന്ത്യയിൽ അനധികൃതമായി പ്രവർത്തിക്കുകയും കള്ളപ്പണം വെളുപ്പിക്കുകയും ചെയ്തുവെന്നാണ് ആരോപണം. രാജ്യത്തെ 17 സംസ്ഥാനങ്ങളിൽ ഇത്തരം കമ്പനികൾ ഓൺലൈൻ ലോണുകൾ, ജോബ് പോർട്ടലുകൾ, ചൈനയിലേക്ക് ഇന്ത്യൻ പണം അനധികൃതമായി അയക്കുക തുടങ്ങിയവുമായി ബന്ധപ്പെട്ട് പ്രവർത്തിക്കുന്നുണ്ട്.
ഈ കമ്പനികളിലെ ഡയറക്ടർമാർ ഇന്ത്യക്കാരാണെങ്കിലും പണം നിക്ഷേപിച്ചിരിക്കുന്നത് ചൈനീസ് കമ്പനികളിലാണ്. ചില കമ്പനികളിൽ പണം വകമാറ്റുന്നുമുണ്ട്. മൊബൈൽ സ്‌ക്രീനുകളും ബാറ്ററികളും നിർമ്മിക്കുന്ന 40 ഓളം ചൈനീസ് കമ്പനികൾക്കെതിരെ കോർപ്പറേറ്റ് കാര്യ മന്ത്രാലയം ഇതിനോടകം അന്വേഷണം ആരംഭിച്ചിട്ടുണ്ട്. 600 ഓളം ചൈനീസ് കമ്പനികൾ നിരീക്ഷണത്തിലുമാണ്.
ഇതിൽ 300 മുതൽ 400 വരെ കമ്പനികളുടെ പ്രവർത്തനം സംശയാസ്പദമാണെന്ന് കണ്ടെത്തിയിട്ടുണ്ട്. ഇവർക്കെതിരെ നടപടിയുണ്ടാകുമെന്ന് ഏറെക്കുറെ ഉറപ്പായിട്ടുണ്ട്. ലോൺ ആപ്പുകളും ഓൺലൈൻ ജോലികൾ വാഗ്ദാനം ചെയ്യുന്ന കമ്പനികളും ഇതിൽ ഉൾപ്പെടുന്നു.ചില കമ്പനികൾക്ക് ഒരു ഇന്ത്യൻ ഡയറക്ടർ ഉണ്ടെങ്കിലും , ഇവരുടെ ബാങ്ക് അക്കൗണ്ട് ചൈനയിലാണ്, ഇടപാടുകളൊന്നും ഇന്ത്യയിൽ രേഖപ്പെടുത്തിയിട്ടില്ല.
കഴിഞ്ഞ കുറച്ച് വർഷങ്ങളായി ഡിജിറ്റൽ വായ്‌പ നൽകുന്ന കമ്പനികൾ അതിവേഗം വളർന്നതായാണ് റിപ്പോർട്ട് . ആർബിഐയുടെ മാർഗനിർദേശങ്ങൾ അവർ പാലിക്കാറില്ല. ഇതുമൂലം നിരവധി ഉപഭോക്താക്കൾ തട്ടിപ്പിന് ഇരയായിട്ടുണ്ട്. 2020ലും മോദി സർക്കാർ ചൈനയ്‌ക്ക് ശക്തമായ തിരിച്ചടിയായി ടിക് ടോക്കും വീചാറ്റും ഉൾപ്പെടെ 59 ചൈനീസ് ആപ്പുകൾ നിരോധിച്ചിരുന്നു.
