വയനാട് : ഉരുള്പൊട്ടല് ദുരന്തത്തില് ജില്ലയിലെ വിവിധ ദുരിതാശ്വാസ ക്യാമ്പുകളില് കഴിയുന്നവരുടെ സ്വകാര്യത കണക്കിലെടുത്ത് ക്യാമ്പുകളിലേക്കുള്ള അനാവശ്യ സന്ദര്ശനം ഒഴിവാക്കണമെന്ന് മന്ത്രി മുഹമ്മദ് റിയാസ്. ക്യാമ്പുകള് വീടാണെന്ന് കണ്ടായിരിക്കണം ഇടപെടേണ്ടത്.
ക്യാമ്പുകളില് കഴിയുന്നവര് വലിയ മാനസിക വിഷമത്തിലാണ്. ക്യാമ്പുകളില് എത്തി അഭിമുഖം എടുക്കുന്നത് ഒഴിവാക്കണം. ക്യാമ്പില് കൂടുതല് നിയന്ത്രണം ഏര്പ്പെടുത്തുമെന്നും മന്ത്രി പറഞ്ഞു.
വെളളിയാഴ്ച 14 മൃതദേഹങ്ങളാണ് കണ്ടെത്തിയത്. മലപ്പുറം ജില്ലയില് നിന്ന് മൂന്നെണ്ണവും വയനാട്ടിലെ ദുരന്തമേഖലയില് നിന്ന് 11 എണ്ണവും കണ്ടെത്തി. സ്കൂള് നിലനിന്നിരുന്ന സ്ഥലത്ത് നിന്ന് മാത്രം എട്ട് മൃതദേഹങ്ങളാണ് കണ്ടെടുത്തത്. നാലുപേരെ ഇന്ന് ജീവനോടെ പടവെട്ടിക്കുന്നില് നിന്ന് രക്ഷിക്കാനായി. നിലവില് 597 കുടുംബങ്ങളാണ് ക്യാമ്പുകളിലുളളത്. 17 ക്യാമ്പുകളാണ് ചൂരല്മല, മുണ്ടക്കൈ ദുരന്തവുമായി ബന്ധപ്പെട്ട് പ്രവര്ത്തിക്കുന്നത്. ആകെ 2303 പേരാണ് ക്യാമ്പുകളില് കഴിയുന്നതെന്നും മന്ത്രി മുഹമ്മദ് റിയാസ് പറഞ്ഞു.
ക്യാമ്പുകളില് ആവശ്യത്തിന് സാധനങ്ങള് ഉണ്ട്. സാധനങ്ങള് അതാത് ജില്ലാ കളക്ടറേറ്റുകളില് നല്കണമെന്നും മുഹമ്മദ് റിയാസ് പറഞ്ഞു.മന്ത്രി എകെ ശശീന്ദ്രനും വാര്ത്താസമ്മേളനത്തില് പങ്കെടുത്തു.
