ചെന്നൈ: തമിഴ്നാട്ടിലെ പ്രമുഖ വാര്‍ത്താ അവതാരകയായിരുന്ന സൗന്ദര്യ അമുദമൊഴി അന്തരിച്ചു. ക്യാന്‍സര്‍ രോഗബാധിതയായി ആറ് മാസമായി ചികിത്സയിലായിരുന്നു. കല്ലുറിച്ചി സ്വദേശിയാണ്. രോഗബാധിതയായി ചികിത്സ തേടിയതിനെ തുടര്‍ന്ന് സമൂഹത്തിന്റെ വിവിധ തുറകളില്‍ നിന്ന് സൗന്ദര്യക്ക് സഹായങ്ങള്‍ ലഭിച്ചിരുന്നു. തമിഴ് ന്യൂസ് റീഡേഴ്സ് അസോസിയേഷനില്‍ നിന്ന് ടെലിവിഷന്‍ മാനേജ്മെന്റ് 5.51 ലക്ഷം രൂപയും മുഖ്യമന്ത്രി എം കെ സ്റ്റാലിന്‍ 50 ലക്ഷം രൂപയും ചികിത്സക്കായി അനുവദിച്ചിരുന്നു. ഏതാനും മാസങ്ങള്‍ക്കുമുമ്പ് വരെ ഉജ്ജ്വലമായ തമിഴ് ഉച്ചാരണത്തോടെ സൗന്ദര്യ വാര്‍ത്തകള്‍ വായിച്ചിരുന്നു.
2024 മെയ് മാസത്തില്‍ ചികിത്സയ്‌ക്കായി സാമ്പത്തിക സഹായം അഭ്യര്‍ത്ഥിച്ചുകൊണ്ടുള്ളതായിരുന്നു അവരുടെ ഇന്‍സ്റ്റാഗ്രാമിലെ അവസാന പോസ്റ്റ്. ഹോസ്പിറ്റലില്‍ നിന്നുള്ള ഒരു ചിത്രം പങ്കുവെച്ചുകൊണ്ട് സൗന്ദര്യ എഴുതി, ‘എന്നെയും എന്റെ ആരോഗ്യത്തെയും ഇപ്പോഴും പരിശോധിക്കുന്ന എല്ലാ ദയയുള്ള ഹൃദയങ്ങളോടും.. ഞാന്‍ ജീവന് ഭീഷണിയായ അവസ്ഥയില്‍ അകപ്പെട്ടുവെന്ന് പറയാന്‍ കഠിനമായ ഹൃദയത്തോടെ നിങ്ങളെ എല്ലാവരേയും അറിയിക്കുന്നു.’
സൗന്ദര്യ അമുദമൊഴിയുടെ നിര്യാണത്തില്‍ തമിഴ്നാട് ഗവര്‍ണര്‍ ആര്‍എന്‍ രവി അഗാധമായ അനുശോചനം രേഖപ്പെടുത്തി.
