കണ്ണൂര്: മിന്നല് ചുഴലിയില് വ്യാപക നാശം. കരിയാട് പടന്നക്കരയിലും ചൊക്ലി ഒളവിലത്തുമാണ് ചുഴലിക്കാറ്റടിച്ചത്.
തലശേരി ഗോപാലപേട്ടയില് വീടിന്റെ മേല്ക്കൂര തകര്ന്ന് പുതിയപുരയില് മിഥുന്- ഷൈനു ദമ്പതികളുടെ ആറുവയസുകാരി മകള് ആത്മികയ്ക്ക് പരിക്കേറ്റു. ഒപ്പമുണ്ടായിരുന്ന ഒരു വയസുള്ള കുട്ടി പരിക്കേല്ക്കാതെ രക്ഷപ്പെട്ടു. വരാന്തയിലിരുന്ന് കളിക്കുമ്പോള് കാറ്റില് മേല്ക്കൂര തകര്ന്ന് ഓട് തലയില് വീഴുകയായിരുന്നു.
പടന്നക്കരയില് നാല് വീടുകള് പൂര്ണമായും തകര്ന്നു. ഒളവിലത്ത് അഞ്ചു വീടുകളാണ് തകര്ന്നത്.
കൂറ്റന് മരങ്ങള് പതിച്ചാണ് വീടുകള് തകര്ന്നത്. വൈദ്യുതി തൂണുകള് തകര്ന്നതോടെ പ്രദേശത്തെ വൈദ്യുതി ബന്ധവും തടസപ്പെട്ടു. മരം വീണ് ഒരു കാറും തകര്ന്നു. ചാവശേരിയില് റോഡില് മരം ഒടിഞ്ഞു വീണു. തലശേരി -മൈസൂര് അന്തര് സംസ്ഥാന പാതയില് ഗതാഗതം തടസപ്പെട്ടു.
