ഇൻഡോർ : കൻവാർ യാത്രാ റൂട്ടിലെ ഭക്ഷണശാലകൾ അതത് ഉടമസ്ഥരുടെ പേരുകൾ പ്രദർശിപ്പിക്കാൻ നിർദ്ദേശിച്ച ഉത്തർപ്രദേശ് സർക്കാരിന്റെ ഉത്തരവിന് പിന്തുണയുമായി ഇൻഡോർ-3 നിയമസഭാ മണ്ഡലത്തിൽ നിന്നുള്ള ബിജെപി എംഎൽഎ ഗോലു ശുക്ല. നിർദ്ദേശത്തിൽ തെറ്റൊന്നും കാണുന്നില്ലെന്ന് ബിജെപി എംഎൽഎ പറഞ്ഞു.
“കഴിഞ്ഞ 21 വർഷമായി ഞങ്ങൾ ബനേശ്വരി കൻവാർ യാത്ര സംഘടിപ്പിക്കുന്നു. ഈ വർഷം, ശ്രാവണ മാസത്തിലെ ആദ്യ തിങ്കളാഴ്ച, ജൂലൈ 22 ന് മഹേശ്വരിൽ നിന്ന് ‘ദുഗ്ധ് അഭിഷേകത്തോടെ നർമ്മദാ നദിയിലേക്ക് യാത്ര ആരംഭിക്കും, ജൂലൈ 29 വരെ തുടരും, ”- ശുക്ല പറഞ്ഞു.
ശ്രാവണ മാസത്തിലെ രണ്ടാം തിങ്കളാഴ്ച, ജൂലൈ 29, ഉജ്ജയിനിലെ മഹാകാലേശ്വര് ക്ഷേത്രത്തിൽ ബാബ മഹാകാലിന് ജലം സമർപ്പിക്കുന്നതോടെ യാത്ര സമാപിക്കും. എട്ട് ദിവസത്തെ യാത്രയിൽ സാധാരണയായി 5,000 പേർ പങ്കെടുക്കുമെന്ന് ശുക്ല ചൂണ്ടിക്കാട്ടി.
കടയുടമകൾ അവരുടെ പേരുകളും ഐഡൻ്റിറ്റികളും അവരുടെ കടകൾക്ക് പുറത്ത് പ്രദർശിപ്പിക്കണം. ഇതിൽ തെറ്റൊന്നുമില്ല. യുപി മുഖ്യമന്ത്രി യോഗി ആദിത്യനാഥ് പറഞ്ഞതിനെ ഞങ്ങൾ പിന്തുണയ്‌ക്കുന്നുവെന്ന് നിർദ്ദേശത്തെ കുറിച്ച് ശുക്ല പറഞ്ഞു. മധ്യപ്രദേശിലും സമാനമായ നിർദ്ദേശത്തിനായി വാദിക്കുമോ എന്ന ചോദ്യത്തിന്, മുഖ്യമന്ത്രി മോഹൻ യാദവുമായി ഇക്കാര്യം ചർച്ച ചെയ്യുമെന്ന് ശുക്ല പറഞ്ഞു.
“ഈ നിർദ്ദേശം കൊണ്ട് വിദ്വേഷം പടർത്തുകയോ ഭിന്നിപ്പിക്കുകയോ ചെയ്യുന്ന പ്രശ്നമില്ല. അത് ഹിന്ദുക്കളെയും മുസ്ലീങ്ങളെയും വിഭജിക്കലല്ല. വർഷങ്ങളായി സംസ്ഥാനത്തെ വിവിധ നഗരങ്ങളിൽ മുസ്ലീം സമൂഹം ഞങ്ങളുടെ കൻവർ യാത്രകളെ സ്വാഗതം ചെയ്യുന്നു,” – അദ്ദേഹം കൂട്ടിച്ചേർത്തു.
തീർത്ഥാടനത്തിന്റെ പവിത്രത ഉയർത്തിപ്പിടിക്കാൻ കൻവാർ റൂട്ടുകളിലെ ഭക്ഷണ-പാനീയ കടകളിൽ ഓപ്പറേറ്ററുടെ/ഉടമയുടെ പേരും ഐഡൻ്റിറ്റിയും പ്രദർശിപ്പിക്കണമെന്ന് ഉത്തർപ്രദേശ് മുഖ്യമന്ത്രി യോഗി ആദിത്യനാഥ് വെള്ളിയാഴ്ച നേരത്തെ ഉത്തരവിട്ടിരുന്നു. കൂടാതെ ഹലാൽ സാക്ഷ്യപ്പെടുത്തിയ ഉൽപ്പന്നങ്ങൾ വിൽക്കുന്നവർക്കെതിരെ നടപടിയെടുക്കുമെന്നും അറിയിച്ചിരുന്നു.
