തിരുവനന്തപുരം: ആമയിഴഞ്ചാന്‍ തോട്ടിലെ അപകടം സംസ്ഥാന സര്‍ക്കാരിന്റെ കാര്യക്ഷമതയില്ലായ്‌മയ്‌ക്കുദാഹരണവും മാപ്പര്‍ഹിക്കാത്ത കുറ്റവുമാണെന്ന് മുന്‍ കേന്ദ്രമന്ത്രി രാജീവ് ചന്ദ്രശേഖര്‍. കോര്‍പ്പറേഷന്‍ ഭരിക്കുന്ന സിപിഎം ആമയിഴഞ്ചാനിലെ പരാജയം ഏറ്റെടുക്കാനുള്ള രാഷ്‌ട്രീയ ധാര്‍മ്മികത കാട്ടണമെന്നും അദ്ദേഹം പറഞ്ഞു.
പിണറായി വിജയന്‍ സര്‍ക്കാരിന്റെ കെടുകാര്യസ്ഥതയ്‌ക്ക് ബലിയാടാകേണ്ടി വരുന്നത് ഉപജീവനത്തിനായി ജോലിക്കിറങ്ങുന്ന പാവപ്പെട്ട ആളുകളാണ്. ജോയിയുടെ ജീവനറ്റ ശരീരം ജീര്‍ണിച്ച നിലയില്‍ അഴുക്കുചാലില്‍ നിന്ന് മൂന്നാം ദിനമാണ് കണ്ടെടുത്തതെന്നത് അതീവ ഖേദകരമാണ്. രക്ഷാദൗത്യമെന്ന് കൊട്ടിഘോഷിച്ച പ്രചാരണം മൂന്നാം നാള്‍ പരാജയപ്പെട്ട് നാവിക സേനയുടെ സഹായമഭ്യര്‍ത്ഥിക്കുകയായിരുന്നു.
രാജ്യത്ത് സ്വച്ഛഭാരത് പ്രവര്‍ത്തനങ്ങള്‍ ഏകോപിപ്പിച്ച് പ്രധാനമന്ത്രി നരേന്ദ്ര മോദിസര്‍ക്കാര്‍ മുന്നോട്ടു പോവുകയാണ്. എന്നാല്‍ മാലിന്യ സംസ്‌കരണ, നിര്‍മ്മാര്‍ജന രംഗത്ത് കേരളത്തിന്റെ പാപ്പരത്തമാണ് ഇപ്പോഴും കാണാന്‍ കഴിയുന്നത്. ഒരിക്കല്‍ തുറന്നെതിര്‍ത്തിരുന്ന വിഴിഞ്ഞം തുറമുഖത്ത് ക്രയിന്‍ വരുന്നതും കപ്പലിന്റെ ട്രയല്‍റണ്ണുമെല്ലാം വന്‍ പരിപാടിയാക്കി ആഘോഷിച്ച ഇടതുപക്ഷവും വികസനം കൊണ്ടുവന്നത് തങ്ങളാണെന്ന് മേനി പറയുന്ന യുഡിഎഫും ഫലപ്രദമായി അഴുക്കുചാലുകള്‍ പോലും നിര്‍മ്മിച്ചിട്ടില്ല.
സാങ്കേതിക രംഗത്തും ഭരണനിര്‍വഹണത്തിലും ലോകം അതിവേഗം കുതിക്കുമ്പോള്‍ അപരിഷ്‌കൃതമായ രീതിയിലാണ് സംസ്ഥാനത്ത് ശുചീകരണമടക്കമുള്ള അടിസ്ഥാന സൗകര്യ സംവിധാനങ്ങള്‍.
സ്മാര്‍ട് സിറ്റിയുടെ പേരില്‍ കോടിക്കണക്കിന് രൂപ ധൂര്‍ത്തടിച്ച് നഗരത്തിലെ മിക്ക റോഡുകളും വന്‍കുഴികളാക്കിയതിന്റെ ദുരിതം ഈ മഴക്കാലത്ത് നഗരവാസികള്‍ അനുഭവിച്ചു കൊണ്ടിരിക്കുകയാണ്. സംസ്ഥാനത്തെ പൊതുമരാമത്ത് വകുപ്പ് നാട്ടുകാര്‍ക്ക് പൊതുശല്യ വകുപ്പായിട്ടുണ്ട്, അദ്ദേഹം പറഞ്ഞു.
തോട് വൃത്തിയാക്കുന്നതിനിടെ കാണാതായ ജോയിയുടെ കുടുംബത്തിന്റെ ദുഃഖത്തില്‍ പങ്കുചേരുന്നതായും ദൗര്‍ഭാഗ്യകരമായ ഈ സംഭവത്തിന് ഉത്തരവാദികളായവരെ കണ്ടെത്തി മുഖംനോക്കാതെ നടപടിയെടുക്കാനുള്ള ആര്‍ജവം ഇനിയെങ്കിലും സര്‍ക്കാര്‍ കാണിക്കണമെന്നും രാജീവ് ചന്ദ്രശേഖര്‍ പറഞ്ഞു.
