ഏഴിമല നാവിക അക്കാദമിയില്‍ സൗജന്യ ബിടെക് പഠനവും ജോലിയും

അവസരം ജെഇഇ മെയിന്‍ 2024 റാങ്കുകാര്‍ക്ക്
സെലക്ഷന്‍ 10+2 (ബിടെക്) കേഡറ്റ് എന്‍ട്രി സ്‌കീം വഴി എസ്എസ്ബി ഇന്റര്‍വ്യൂവിലൂടെ 
വിശദവിവരങ്ങളടങ്ങിയ വിജ്ഞാപനം www.joinindiannavy.gov.in ല്‍

ജൂലൈ 20 വരെ ഓണ്‍ലൈനായി അപേക്ഷിക്കാം
ഒഴിവുകള്‍ 40 (വനിതകള്‍ക്ക് 8 ഒഴിവുകള്‍)
മുഴുവന്‍ പഠന പരിശീലന ചെലവുകളും നാവികസേന വഹിക്കും

ഏഴിമല നാവിക അക്കാദമിയില്‍ 10+2 (ബിടെക്) കേഡറ്റ് എന്‍ട്രി വഴി 2025 ജനുവരിയിലാംഭിക്കുന്ന കോഴ്‌സിലേക്ക് അവിവാഹിതരായ പുരുഷന്മാര്‍ക്കും വനിതകള്‍ക്കും അപേക്ഷിക്കാം. എക്‌സിക്യൂട്ടീവ്, ടെക്‌നിക്കല്‍ (എന്‍ജിനീയറിങ് ആന്റ് ഇലക്ട്രിക്കല്‍) ബ്രാഞ്ചുകളിലായി 40 ഒഴിവുകളാണുള്ളത്. വനിതകള്‍ക്ക് പരമാവധി 8 ഒഴിവുകളിലാണ് അവസരം. വിശദവിവരങ്ങളടങ്ങിയ വിജ്ഞാപനം www.joinindiannavy.gov.in ല്‍ ലഭിക്കും.

യോഗ്യത: ഫിസിക്‌സ്, കെമിസ്ട്രി, മാത്തമാറ്റിക്‌സ് വിഷയങ്ങള്‍ക്ക് മൊത്തം 70 ശതമാനം മാര്‍ക്കില്‍ കുറയാതെ ഹയര്‍ സെക്കന്ററി/പ്ലസ്ടു/തത്തുല്യ ബോര്‍ഡ് പരീക്ഷ വിജയിച്ചിരിക്കണം. പ്ലസ്ടു അല്ലെങ്കില്‍ പത്താം ക്ലാസ് പരീക്ഷയില്‍ ഇംഗ്ലീഷിന് 50% മാര്‍ക്കുണ്ടാകണം. ജെഇഇ മെയിന്‍ 2024 (ബിഇ/ബിടെക്) പരീക്ഷ അഭിമുഖീകരിച്ചിട്ടുള്ളവരെയാണ് പരിഗണിക്കുക. മെഡിക്കല്‍, ഫിസിക്കല്‍ ഫിറ്റ്‌നസുണ്ടായിരിക്കണം. 2005 ജൂലൈ രണ്ടിനും 2008 ജനുവരി ഒന്നിനും മധ്യേ ജനിച്ചവരാകണം. നിശ്ചിത യോഗ്യതകള്‍ ഉള്ളവര്‍ക്ക് ജൂലൈ 20 വരെ ഓണ്‍ലൈനായി രജിസ്റ്റര്‍ ചെയ്യാം. ഒറ്റ അപേക്ഷ നല്‍കിയാല്‍ മതി.

സെലക്ഷന്‍: ജെഇഇ മെയിന്‍ 2024 ഓള്‍ ഇന്ത്യ റാങ്ക് അടിസ്ഥാനത്തില്‍ അപേക്ഷകരുടെ ചുരുക്കപ്പട്ടിക തയ്യാറാക്കി സര്‍വ്വീസസ് സെലക്ഷന്‍ ബോര്‍ഡ് (എസ്എസ്ബി) ഇന്റര്‍വ്യൂവിന് ക്ഷണിക്കും. ബാംഗ്ലൂര്‍, ഭോപാല്‍, കൊല്‍ക്കത്ത, വിശാഖപട്ടണം എന്നിവിടങ്ങളില്‍ 2024 സെപ്തംബറില്‍ ഇന്റര്‍വ്യു ആരംഭിക്കും. ഇതു സംബന്ധിച്ച അറിയിപ്പ് ഇ-മെയില്‍/എസ്എംഎസ് വഴി ലഭിക്കും. എസ്എസ്ബി ഇന്റര്‍വ്യു മാര്‍ക്കടിസ്ഥാനത്തില്‍ മെരിറ്റ് ലിസ്റ്റ് തയ്യാറാക്കി വൈദ്യപരിശോധന നടത്തിയാണ് തെരഞ്ഞെടുപ്പ്.

തെരഞ്ഞെടുക്കപ്പെടുന്ന കേഡറ്റുകള്‍ക്ക് അപ്ലൈഡ് ഇലക്‌ട്രോണിക്‌സ് ആന്റ് കമ്മ്യൂണിക്കേഷന്‍, മെക്കാനിക്കല്‍, ഇലക്‌ട്രോണിക്‌സ് ആന്റ് കമ്മ്യൂണിക്കേഷന്‍ ബ്രാഞ്ചുകളില്‍ നാലുവര്‍ഷത്തെ ബിടെക് പഠന സൗകര്യവും നേവല്‍ പരിശീലനങ്ങളും ലഭിക്കുന്നതാണ്. മുഴുവന്‍ പഠന പരിശീലന ചെലവുകളും നാവികസേന വഹിക്കും. ജവഹര്‍ലാല്‍ നെഹ്‌റു സര്‍വ്വകലാശാലയാണ് ബിടെക് ബിരുദം സമ്മാനിക്കുക. പരിശീലനം പൂര്‍ത്തിയാക്കുന്നവരെ സ്ഥിരം കമ്മീഷന്‍ഡ് ഓഫീസറായി നിയമിക്കും. ശമ്പളം അടക്കം കൂടുതല്‍ വിവരങ്ങള്‍ വെബ്‌സൈറ്റില്‍ ലഭിക്കും.