കോഴിക്കോട് : തിരുവമ്പാടി കെ എസ് ഇ ബി ഓഫീസില്‍ അതിക്രമം കാട്ടിയ യൂത്ത് കോണ്‍ഗ്രസ് നേതാവിന്റെ വീട്ടിലെ വൈദ്യുതി കണക്ഷന്‍ വിച്ഛേദിച്ചു. കെ എസ് ഇ ബി ചെയര്‍മാനും എം ഡിയുമായ ബിജു പ്രഭാകറിന്റെ ഉത്തരവിന്റെ അടിസ്ഥാനത്തിലാണിത്.
യൂത്ത് കോണ്‍ഗ്രസ് തിരുവമ്പാടി മണ്ഡലം മുന്‍ പ്രസിഡന്റ് അജ്മലും സഹോദരന്‍ ഷഹദാദുമാണ് കെ എസ് ഇ ബി ഓഫീസിലെത്തി കമ്പ്യൂട്ടര്‍ ഉള്‍പ്പെടെ തല്ലി തകര്‍ത്തത്. ജീവനക്കാരെ കയ്യേറ്റം ചെയ്യുകയും ചെയ്തു. ജീവനക്കാരുടെ മേല്‍ ചീത്തയായ കറികളുള്‍പ്പെടെ കോരി ഒഴിച്ചു.
മൂന്ന് ലക്ഷം രൂപയുടെ നഷ്ടമുണ്ടായെന്നാണ് കെ എസ് ഇ ബി പറയുന്നത്. ഇത് നികത്തിയാല്‍ വൈദ്യുതി കണക്ഷന്‍ പുനസ്ഥാപിക്കുന്നത് പരിഗണിക്കാമെന്നാണ് അധികൃതര്‍ അറിയിച്ചത്.
ശനിയാഴ്ച രാവിലെയാണ് അതിക്രമമുണ്ടായത്.മര്‍ദ്ദനമേറ്റ അസിസ്റ്റന്റ് എഞ്ചിനീയറും നാല് ജീവനക്കാരും മുക്കം സര്‍ക്കാര്‍ ആശുപത്രിയില്‍ ചികിത്സയിലാണ്. അക്രമികള്‍ക്കെതിരെ തിരുവമ്പാടി പൊലീസ് ജാമ്യമില്ലാ വകുപ്പുകള്‍ പ്രകാരം കേസെടുത്തിട്ടുണ്ട്.
അതേസമയം കെ എസ് ഇ ബിയുടെ പ്രതികാര നടപടിയെ നിയമപരമായി നേരിടുമെന്ന് യൂത്ത് കോണ്‍ഗ്രസ് പറഞ്ഞു.
പ്രതികരിക്കാൻ ഇവിടെ എഴുതുക: