ആലപ്പുഴ: 15 വര്‍ഷം മുമ്പ് ഒരു ഒക്ടോബര്‍ മാസത്തിലാണ് മാന്നാറില്‍ നിന്നും കലയെ കാണാതാകുന്നതെന്ന് വെളിപ്പെടുത്തല്‍.കലയുടെ സഹോദരന്റെ ഭാര്യ ശോഭന കുമാരിയാണ് ഇക്കാര്യം പറഞ്ഞത്. എന്നാല്‍ കാണാതായെന്ന് പറയാനാകില്ലെന്നും യാത്ര പറഞ്ഞു പോയതാണെന്നും ഇവര്‍ പറഞ്ഞു.
പോയ ശേഷം രണ്ട് തവണ ഫോണില്‍ വിളിച്ചു. പാലക്കാട് ഉള്ള സുഹൃത്ത് സൂരജിനൊപ്പം ആണെന്ന് കല പറഞ്ഞു എന്നാണ് ശോഭന കുമാരി പറയുന്നത്. മറ്റ് പരാതികളോ പരിഭവമോ ഒന്നും പറഞ്ഞതുമില്ല.
അനില്‍ കുമാറുമായി വിവാഹം രജിസ്റ്റര്‍ ചെയ്തിട്ടില്ല. സമുദായ വിവാഹം നടന്നു. രണ്ട് പേരും രണ്ട് സമുദായത്തില്‍ പെട്ടവരാണ്. അനില്‍ കുമാറും കലയും തമ്മില്‍ മറ്റ് തര്‍ക്കങ്ങള്‍ ഉണ്ടായിരുന്നതായി അറിവില്ല.കല ഇപ്പോഴും ജീവനോടെ ഉണ്ടെന്നാണ് കരുതിയിരുന്നത്. പൊലീസില്‍ പരാതിപ്പെടാതിരുന്നത് നാണക്കേട് കൊണ്ടാണാണെന്നും മറ്റൊരാളുടെ കൂടെ പോയി എന്നാണ് വിശ്വസിച്ചിരുന്നതെന്നും ശോഭന കുമാരി പറഞ്ഞു.
എന്നാല്‍ കഴിഞ്ഞ വെള്ളിയാഴ്ച പൊലീസ് എത്തിയപ്പോഴാണ് മരിച്ചു എന്ന വിവരം കിട്ടുന്നതെന്നും ശോഭന കുമാരി കൂട്ടിച്ചേര്‍ത്തു.
