തിരുവനന്തപുരം: തമിഴ്നാട്ടില് കെഎസ്ആര്ടിസി ബസുകള്ക്ക് നികുതി ചുമത്തുന്നതിനെ വിമര്ശിച്ച് ഗതാഗത മന്ത്രി കെ ബി ഗണേഷ് കുമാര്. കേരള സര്ക്കാരുമായി കൂടിയാലോചന നടത്താതെ തമിഴ്നാട് 4000 രൂപ നികുതി വര്ധിപ്പിച്ചെന്ന് മന്ത്രി പറഞ്ഞു.
കെഎസ്ആര്ടിസി ബസുകള്ക്ക് മുന്നറിയിപ്പ് ഇല്ലാതെ തമിഴ്നാട്ടില് നികുതി ഈടാക്കിയാല് തമിഴ്നാടിന്റെ വണ്ടി കേരളവും പിടിച്ചിടുമെന്ന് ഗതാഗത മന്ത്രി മുന്നറിയിപ്പ് നല്കി. അവിടെ 4000 വാങ്ങിയാല് ഇവിടെയും 4000 വാങ്ങും. ശബരിമല സീസണാണ് വരുന്നതെന്ന് തമിഴ്നാട് ഓര്ക്കണമെന്ന് പറഞ്ഞ ഗണേഷ് കുമാര് ഏറ്റവും കൂടുതല് തീര്ത്ഥാടകര് ശബരിമലയില് എത്തുന്നത് തമിഴ്നാട്ടില് നിന്നാണെന്നും ചൂണ്ടിക്കാട്ടി.
കെഎസ്ആര്ടിസി ജീവനക്കാര്ക്ക് ഒന്നാം തിയതി തന്നെ ശമ്പളം നല്കുന്നതിന് പദ്ധതി ഉണ്ടാക്കിയിട്ടുണ്ട്. അതേസമയം കെഎസ്ആര്ടിസി ജീവനക്കാര് കള്ള് കുടിക്കുന്നുണ്ടോ എന്നു പരിശോധിക്കുന്ന സര്ക്കാര് അവര് കഞ്ഞി കുടിച്ചോ എന്ന് പരിശോധിക്കണം എന്ന് കോണ്ഗ്രസ് എം വിന്സന്റ് എംഎല്എ വിമര്ശിച്ചു.
കെഎസ്ആര്ടിസി ജീവനക്കാര്ക്ക് കഞ്ഞികുടിക്കാനുള്ള വകയുണ്ടാക്കും എന്നും എന്നാല് കള്ള് കുടിച്ച് വണ്ടി ഓടിക്കാന് അനുവദിക്കില്ലെന്നും ഗതാഗത മന്ത്രി നിയമസഭയില് മറുപടി നല്കി.
