കൊടുങ്ങല്ലൂര്‍: തേക്കിന്‍ തടിയില്‍ പ്രധാനമന്ത്രിയുടെ പൂര്‍ണകായ പ്രതിമ ഒരുങ്ങി. പ്രശസ്ത ശില്‍പി രവീന്ദ്രന്‍ ശില്‍പശാലയാണ് മനോഹരമായ പ്രതിമ നിര്‍മ്മിച്ചത്.
ബിജെപി തൃശൂര്‍ ജില്ലാ കമ്മറ്റി ഓഫീസില്‍ സ്ഥാപിക്കുന്നതിനു വേണ്ടിയാണ് കൊടുങ്ങല്ലൂര്‍ സ്വദേശിയായ രവീന്ദ്രന്‍ ആറര അടി ഉയരവും ആറിഞ്ച് കനവുമുള്ള നരേന്ദ്ര മോദിയുടെ പ്രതിമ ഒരുക്കിയിട്ടുള്ളത്.
അമ്പത് ദിവസം നീണ്ട പരിശ്രമത്തിലൂടെയാണ് രവീന്ദ്രനും സഹായി സിയാദും ചേര്‍ന്ന് ഇത് നിര്‍മ്മിച്ചത്. ശ്രീനാരായണപുരം ശംഖു ബസാറിലുള്ള രവീന്ദ്രന്റെ വീടിനോട് ചേര്‍ന്നുള്ള പണിശാലയിലാണ് ശില്‍പം പൂര്‍ത്തിയാക്കിയത്. മൂന്ന് ലക്ഷത്തോളം രൂപ ശില്‍പ്പത്തിന്റെ നിര്‍മ്മാണത്തിന് ചിലവായതായി രവീന്ദ്രന്‍ പറഞ്ഞു. ഭാരതാംബ ഉള്‍പ്പടെ ശ്രദ്ധേയമായ നിരവധി ശില്‍പങ്ങള്‍ രവീന്ദ്രന്‍ നിര്‍മ്മിച്ചിട്ടുണ്ട്.
