ടെല്‍അവീവ്: തെക്കന്‍ ഗാസ മുനമ്പില്‍ ദിവസവും 12 മണിക്കൂര്‍ താത്ക്കാലിക വെടിനിര്‍ത്തല്‍ പ്രഖ്യാപിച്ച് ഇസ്രായേല്‍ സൈന്യം. മേഖലയിലെ സാധാരണക്കാര്‍ക്കുള്ള സന്നദ്ധസംഘടനകളുടെ സഹായങ്ങള്‍ സുഗമമായി എത്തിക്കുന്നതിനായാണ് വെടിനിര്‍ത്തല്‍ പ്രഖ്യാപിച്ചത്. ഇനിയൊരു അറിയിപ്പുണ്ടാകുന്നതുവരെ ദിവസവും രാവിലെ എട്ട് മുതല്‍ വൈകിട്ട് ഏഴ് വരെ റഫയില്‍ യുദ്ധം മരവിപ്പിക്കുമെന്ന് സൈന്യം അറിയിച്ചു.
ഗാസ മുനമ്പിലേക്ക് സഹായവുമായെത്തുന്ന ട്രക്കുകള്‍ക്ക് റഫയിലേക്കുള്ള പ്രധാന പ്രവേശനമാര്‍ഗമായ കരേം ഷാലോം കടക്കാനും സലാ അ ദിന്‍ ദേശീയപാതയിലൂടെ പോകാനും സുരക്ഷ ഉറപ്പുവരുത്തുന്നതിനാണ് വെടിനിര്‍ത്തല്‍. മെയില്‍ ഇസ്രായേല്‍ സൈന്യം റഫയിലേക്ക് കടന്നതുമുതല്‍ കരേം ഷാലോം വഴിയുള്ള സഹായനീക്കം പ്രതിസന്ധിയിലായിരുന്നു. ദിവസവും 500 ട്രക്ക് സഹായം വേണ്ടിടത്ത് മെയ് ആറു മുതല്‍ ജൂണ്‍ ആറു വരെ 68 ട്രക്കുകള്‍ മാത്രമാണ് എത്തിയത്.
