കളമശേരി: മഹാരഥന്‍മാരുടെ പേരുകള്‍ മക്കളുടെ പേരിനോട് ചേര്‍ക്കുമ്പോള്‍ അതിലൊരാള്‍ ലോകത്തോളം ഉയരുന്നൊരു നാമധാരിയാകുമെന്ന് പിതാവ് ഓര്‍ത്തിട്ടുണ്ടാകുമോ?.
എറണാകുളം ചിറ്റൂരിലെ കൊടുവേലി പറമ്പ് പൈലി- റാണി ദമ്പതികളുടെ മൂന്ന് ആണ് മക്കള്‍ ഇങ്ങനെയാണ്. അഭിലാഷ് ഫ്രേസര്‍, സംഗീത് ഡയോലിന്‍, അനുരാഗ് ഷെറീറ്റര്‍. മൂത്ത മകന്‍ തന്റെ പേര് വന്നവഴിയെ ലോകത്തിലേക്ക് കടന്നു കയറിയിരിക്കുകയാണ്. പൈതൃകസംസ്‌കാരത്തിന്റെ ചരിത്രഗാഥകള്‍ പിറന്ന കൊച്ചിയുടെ സ്വന്തം എഴുത്തുകാരന്‍ ഇന്ന് ലോകത്തോളം വളര്‍ന്നിരിക്കുകയാണ്. അഭിലാഷ് ഫ്രേസറെന്ന പ്രതിഭാധനനും ഗ്രന്ഥകാരനുമായ എഴുത്തുകാരന്‍.
സ്‌പെയിന്‍ ആസ്ഥാനമായ മാസ്റ്റിക്കഡോറസ് (Masticadores) എന്ന ആഗോള ഓണ്‍ലൈന്‍ സാഹിത്യമാസികയുടെ എഡിറ്റോറിയല്‍ ടീമില്‍ ഭാരതത്തില്‍ നിന്നുള്ള ഏക അംഗമാണ് അഭിലാഷ് ഫ്രേസര്‍.
പ്രശസ്ത സ്പാനീഷ് എഴുത്തുകാരനായ യുവാന്‍ റി ക്രിവെല്ലോയാണ് (Juanrecrivello) മാസ്റ്റിക്കഡോറസ് എന്ന ആഗോള മാസികയുടെ സ്ഥാപകന്‍. അമേരിക്ക, സ്‌പെയിന്‍, ഇറ്റലി, ബ്രസീല്‍, ഫിലിപ്പീന്‍സ്, കാനഡ, ഇന്ത്യ, മെക്‌സിക്കോ, ഫ്രാന്‍സ്. ടര്‍ക്കി, തായ്വാന്‍, പോര്‍ച്ചുഗല്‍ തുടങ്ങി ലോകത്തിലെ പന്ത്രണ്ടോളം രാജ്യങ്ങളില്‍ പ്രത്യേക എഡീഷനുകളിലായി ഇന്ന് ഈ സാഹിത്യ ജേണല്‍ പ്രവര്‍ത്തിക്കുന്നു.
മാസ്റ്റിക്കഡോറസിന്റെ ഇന്ത്യ, കാനഡ എഡീഷനുകളുടെ എഡിറ്ററാണ് അഭിലാഷ് ഫ്രേസര്‍. വിവിധ ഭാഷകളിലായി ഈ മാസികയ്‌ക്ക് 15 എഡിറ്റര്‍മാരുണ്ട്. യുവാന്‍ റി ക്രിവെല്ലോയാണ് എഡിറ്റര്‍ ഇന്‍ ചീഫ്. പുലിറ്റ്‌സര്‍ പ്രൈസ് നോമിനികള്‍ ഉള്‍പ്പെടെ ലോക പ്രശസ്തരായ പല എഴുത്തുകാര്‍ സ്ഥിരമായി എഴുതുന്ന മാസ്റ്റിക്കഡോറസ് മാസികയില്‍ 400 ലേറെ ആഗോള എഴുത്തുകാരുണ്ട്. വളരെയേറെ ശ്രദ്ധിക്കപ്പെട്ട ഐ ബിലീവ്, ഓപ്പറേഷന്‍ ഹോപ്പ് തുടങ്ങിയ സൈറ്റ് ആന്‍ഡ് സൗണ്ട് ഷോകളുടെ തിരക്കഥ, ഈ വര്‍ഷത്തെ പനോരമ അന്താരാഷ്‌ട്ര സാഹിത്യ പുരസ്‌കാരത്തിന് അര്‍ഹമായ ഫാദര്‍ എന്ന ഇംഗ്ലീഷ് കവിതാസമാഹാരം (അമേരിക്കയിലെ വിപ്ഫ് ആന്‍ഡ് സ്റ്റോക്കാണ് ഈ പുസ്തകത്തിന്റെ പ്രസാധകര്‍) ദി എന്‍ഡ് ഓഫ് വാര്‍സ്, പ്രപഞ്ചഗാഥ (നോവലുകള്‍). എവര്‍ ലാസ്റ്റിംഗ് തിംങ്‌സ് ആര്‍ ഇന്‍ കംപ്ലീറ്റ് (കവിതാ സമാഹാരം) ദലമര്‍മരം, സജലം, രാമഴയുടെ തീരത്ത്, പറവകളുടെ വഴി, നിന്‍ വിരല്‍ത്തുമ്പില്‍, ക്രിസ്മസ് മഞ്ഞ്, കര്‍ദ്ദിനാള്‍ ന്യൂമാന്‍ എന്നിവയാണ് അഭിലാഷിന്റെ പുസ്തകങ്ങള്‍.
2014ല്‍ കെസിബിസി യുവപ്രതിഭാ പുരസ്‌കാരം, ക്രിയാറ്റിഫ് നോവല്‍ പുരസ്‌കാരം, വിശ്വധര്‍മം നോവല്‍ പുരസ്‌കാരം മുതലായവ നേടിയിട്ടുണ്ട്. ഈ വര്‍ഷം ജൂലൈ 1, 2 ദിനങ്ങളില്‍ നടക്കുന്ന റൈറ്റേഴ്‌സ് ക്യാപിറ്റല്‍ ഇന്റര്‍നാഷണല്‍ ഫൗണ്ടേഷന്റെ ആഗോള സാഹിത്യ ഉച്ചകോടിയില്‍ പ്രത്യേക അതിഥിയായി പങ്കെടുക്കാനും പുരസ്‌കാരം സ്വീകരിക്കാനും ഗ്രീസിന്റെ തലസ്ഥാനമായ ഏഥന്‍സിലേക്ക് പോകാനുള്ള ശ്രമത്തിലാണ് അഭിലാഷ്.
90 ലോക രാജ്യങ്ങളില്‍ നിന്നുള്ള എഴുത്തുകാര്‍ പങ്കെടുത്ത പനോരമ അന്താരാഷ്‌ട്ര സാഹിത്യോത്സവത്തില്‍ അഭിലാഷ് ഇന്ത്യയെ പ്രതിനിധീകരിച്ച് പങ്കെടുക്കുകയും പ്രത്യേക ജൂറി പുരസ്‌കാരം നേടുകയും ചെയ്തിരുന്നു. ഐക്യരാഷ്‌ട്ര സഭയുടെ സിവില്‍ സൊസൈറ്റീസിന്റെ അംഗീകാരമുള്ള റൈറ്റേഴ്‌സ് ഇന്റര്‍നാഷണല്‍ ക്യാപ്പിറ്റല്‍ ഫൗണ്ടേഷന്റെ എക്‌സിക്യുട്ടീവ് അംഗമായി അഭിലാഷ് തെരഞ്ഞെടുക്കപ്പെട്ടു.
കേരളത്തില്‍ വേരുകളുള്ള കേംബ്രിഡ്ജ് ഭാഷാപണ്ഡതനും ലോകപ്രശസ്ത കവിയുമായ പ്രീത് പത്മാനഭന്‍ നമ്പ്യാര്‍ രൂപം കൊടുത്ത ഈ ആഗോള സംഘടനയില്‍ ഇപ്പോള്‍ 87 രാജ്യങ്ങളില്‍ നിന്നുള്ള അംഗങ്ങളുണ്ട്. ഗ്രീസ് സ്വദേശിയായ ഐറീന്‍ ദൗറ കവാഡിയ ആണ് സെക്രട്ടറി ജനറല്‍. കഴിവിന്റെയും കഠിനാധ്വാനത്തിനെയും അര്‍പ്പണബോധത്തിന്റെയും മാനദണ്ഡത്തില്‍ മാത്രം കൈവരുന്ന സ്വപ്‌ന തുല്യമായ ബഹുമതിയാണ് അഭിലാഷ് ഫ്രേസര്‍ നേടിയിരിക്കുന്നത്.
ഭാര്യ: സുനിത വര്‍മ ഹോംസില്‍ ഡിസൈന്‍ എഞ്ചീനിയറാണ്. മൂത്ത മകന്‍ എസെക്ക് എട്ടാം
ക്ലാസിലും ഇളയ മകന്‍ ഇസാന്‍ അഞ്ചാം ക്ലാസിലും വടുതല ഡോണ്‍ബോസ്‌കോ സ്‌കൂളില്‍ പഠിക്കുന്നു. എറണാകുളം ചിറ്റൂരിലാണ് അഭിലാഷ് ഫ്രേസറും കുടുംബവും ഇപ്പോള്‍ താമസിക്കുന്നത്.
ജന്മഭൂമി ഓണ്‍ലൈന്‍