കൊച്ചി: കാലവര്‍ഷം 10 ദിവസം പിന്നിടുമ്പോള്‍ സംസ്ഥാനത്ത് പൊതുവെ മഴ ലഭിച്ച ജില്ലകളായി വടക്കന്‍ മേഖല. കോഴിക്കോട്, വയനാട്, മലപ്പുറം, കണ്ണൂര്‍, കാസര്‍കോട് ജില്ലകളിലാണ് പൊതുവെ നിലവില്‍ മഴ ലഭിക്കുന്നത്.
ഈ ജില്ലകളില്‍ ശരാശരി 25 ശതമാനത്തില്‍ താഴെയാണ് മഴക്കുറവ്. നിലവില്‍ ഏറ്റവും കൂടുതല്‍ മഴ കുറഞ്ഞത് കൊല്ലം, ആലപ്പുഴ ജില്ലകളിലാണ്. യഥാക്രമം 47, 46 ശതമാനം വീതം. സംസ്ഥാനത്ത് 19 ശതമാനം മഴയുടെ കുറവുമുണ്ട്. ഇന്ന് കണ്ണൂര്‍, കാസര്‍കോട് ജില്ലകളിലാണ് ഓറഞ്ച് അലര്‍ട്ട്. വയനാട്, കോഴിക്കോട്, മലപ്പുറം, പാലക്കാട്, തൃശ്ശൂര്‍, എറണാകുളം, ആലപ്പുഴ ജില്ലകളില്‍ യെല്ലോ അലര്‍ട്ടുണ്ട്.
ഇന്നും പൊതുവെ മഴ കുറയുകയും വെയില്‍ എത്തുകയും ചെയ്യും. എന്നാല്‍ ഉച്ചയോടെ വടക്കും പിന്നാലെ മധ്യകേരളത്തിലും വിവിധയിടങ്ങളില്‍ മഴയ്‌ക്ക് സാധ്യതയുണ്ട്. എന്നാല്‍ ഏറെ നേരം മഴ നീണ്ട് നില്ക്കില്ല. പെട്ടെന്ന് കാര്‍മേഘം രൂപപ്പെട്ട് പെയ്‌തൊഴിയുകയും വെയില്‍ തിരികെ എത്തുകയും ചെയ്യും. മഹാരാഷ്ടയ്‌ക്ക് സമീപം തുടരുന്ന അന്തരീക്ഷച്ചുഴിയാണ് നിലവിലെ മഴയ്‌ക്ക് കാരണം. അതേസമയം കാലവര്‍ഷം ഗുജറാത്തിന് സമീപം വരെ നിലവില്‍ എത്തിക്കഴിഞ്ഞു.
