വടക്കഞ്ചേരി: കുതിരാനില്‍ പാലക്കാട് നിന്ന് തൃശൂര്‍ ഭാഗത്തേക്കുള്ള തുരങ്കത്തിലെ കോണ്‍ക്രീറ്റിങ് ജോലികള്‍ പൂര്‍ത്തിയായി. ബാക്കി പണികള്‍ കൂടി പൂര്‍ത്തിയാക്കി അടുത്തയാഴ്ച തുരങ്കം തുറന്നു കൊടുക്കുമെന്ന് നിര്‍മാണ കമ്പനി അധികൃതര്‍ പറഞ്ഞു.
തുരങ്കത്തിനുള്ളിലെ വൈദ്യുതീകരണവും എക്സോസ്റ്റ് ഫാനുകളുടെ പ്രവര്‍ത്തനവും പരിശോധിച്ച് വേണ്ട മാറ്റങ്ങള്‍ വരുത്തും. വെന്റിലേഷന്‍, അഗ്നിസുരക്ഷാ സംവിധാനങ്ങള്‍, യന്ത്രവല്‍കൃത തീയണയ്‌ക്കല്‍ സംവിധാനം, തീയണയ്‌ക്കാനുള്ള വാല്‍വുകള്‍ എന്നിവ തുരങ്കത്തിനുള്ളില്‍ സ്ഥാപിക്കണമെന്ന് അഗ്നിസുരക്ഷാ വിഭാഗം ആവശ്യപ്പെട്ടിട്ടുണ്ട്.
പെട്രോളിയം ടാങ്കറുകള്‍ അടക്കമുള്ള വാഹനങ്ങള്‍ കടന്നുപോകുന്നതിനാല്‍ ദുരന്തനിവാരണത്തിന് ശക്തമായ സംവിധാനം ഒരുക്കണമെന്നാണ് ആവശ്യം. തുരങ്കത്തിലെ സുരക്ഷ ഉറപ്പാക്കാന്‍ പത്തോളം നിരീക്ഷണ ക്യാമറകള്‍ സ്ഥാപിച്ചിട്ടുണ്ട്. തുരങ്കത്തിനുള്ളിലെ ദൃശ്യങ്ങള്‍ സിസിടിവി വഴി പോലീസിനു കാണുന്നതിനും സൗകര്യമുണ്ട്.
