കൊല്ക്കത്ത: ലോക്സഭാ തെരഞ്ഞെടുപ്പ് ഫലപ്രഖ്യാപനത്തിന് ശേഷം ബംഗാളില് പരക്കെ കലാപം അഴിച്ചുവിട്ട് തൃണമൂല് കോണ്ഗ്രസ് പ്രവര്ത്തകര്.
ജൂണ് നാലിനുണ്ടായ അതിക്രമത്തെ തുടര്ന്ന് പതിനായിരത്തോളം ബിജെപി പ്രവര്ത്തകരും കുടുംബാംഗങ്ങളും വീടുപേക്ഷിച്ച് പാര്ട്ടി ഓഫീസുകളില് അഭയം പ്രാപിക്കേണ്ടി വന്നിരിക്കുകയാണെന്ന് ബംഗാളിലെ ബിജെപി എംഎല്എയും പ്രതിപക്ഷ നേതാവുമായ സുവേന്ദു അധികാരി പറഞ്ഞു. ഇത് സംബന്ധിച്ച് ഗവര്ണര് സി.വി. ആനന്ദ ബോസിന് അദ്ദേഹം കത്തെഴുതി.
ബംഗാളിലെ വിവിധ പ്രദേശങ്ങള് സന്ദര്ശിച്ച് സ്ഥിതി വിലയിരുത്തണമെന്നും സുവേന്ദു അധികാരി ഗവര്ണറോട് അഭ്യര്ത്ഥിച്ചു. ജില്ലയുടെ വിവിധ ഭാഗങ്ങളിലായി ഇരുപതില് അധികം അക്രമ സംഭവങ്ങളാണ് ഉണ്ടായിട്ടുള്ളത്. അസന്സോള്, ദുര്ഗാപുര്, മണ്ഡിപുര്, ഝാര്ഗ്രാം, ബങ്കുറ, കൂച്ച് ബെഹാര്, ഹൂഗ്ലി, ബറാക്പോര്, ബരാസാത്, നോര്ത്ത് 24 പര്ഗനാസ് എന്നിവിടങ്ങളിലാണ് അതിക്രമം രൂക്ഷമായത്.
ബംഗാളിലെ അക്രമം നിയന്ത്രിക്കാന് കേന്ദ്ര സേനയെ ഉപയോഗിക്കുന്നില്ലെന്നും സുവേന്ദു ആരോപിച്ചു. തെരഞ്ഞെടുപ്പ് ഫലപ്രഖ്യാപന ശേഷം ബംഗാളില് തൃണമൂല് ഗുണ്ടകള് അക്രമാസക്തരായി ബിജെപി പ്രവര്ത്തകര്ക്കുനേരെ അക്രമം അഴിച്ചുവിടുകയാണ്. 2021ല് നിയമസഭാ തെരഞ്ഞെടുപ്പ് ഫലപ്രഖ്യാപനശേഷമുണ്ടായ സംഭവവികാസങ്ങള് 2024ലും ആവര്ത്തിക്കുകയാണ്. 2021ലെ അതിക്രമത്തില് നിരവധി ബിജെപി പ്രവര്ത്തകര്ക്ക് ജീവന് നഷ്ടമായതായും സുവേന്ദു ഗവര്ണര്ക്ക് അയച്ച കത്തില് സൂചിപ്പിച്ചു.
