ന്യൂയോര്‍ക്ക്: മാധ്യമ മുതലാളി റൂപര്‍ട്ട് മര്‍ഡോക്ക് വിവാഹിതനായി. 93ാം വയസ്സില്‍ അഞ്ചാം തവണയാണ് റൂപര്‍ട്ട് വിവാഹിതനാകുന്നത്. വിരമിച്ച മോളിക്യുലാര്‍ ബയോളജിസ്റ്റായ കാമുകി എലീന സുക്കോവ (67) യെയാണ് അദ്ദേഹം കല്യാണം കഴിച്ചത്.
കാലിഫോര്‍ണിയയിലെ ബെല്‍ എയറിലെ അദ്ദേഹത്തിന്റെ വൈന്‍യാര്‍ഡ് എസ്‌റ്റേറ്റില്‍ നടന്ന ചടങ്ങില്‍ വച്ചാണ് വിവാഹിതരായത്. നവദമ്പതികളുടെ ചിത്രങ്ങള്‍ ന്യൂസ് കോര്‍പ്പറേഷന്‍ പുറത്തുവിട്ടു. മാര്‍ച്ചില്‍ ഇരുവരും വിവാഹനിശ്ചയം നടന്നിരുന്നു. മോഡലും നടിയുമായ ജെറി ഹാളിനെ റൂപര്‍ട്ട് മര്‍ഡോക് അടുത്തിടെ വിവാഹം കഴിച്ചിരുന്നു. 2016 ല്‍ വിവാഹിതരായ ഇവര്‍ 2022 ല്‍ വിവാഹമോചനം നേടി.
ശതകോടീശ്വരനും ഊര്‍ജ നിക്ഷേപകനും റഷ്യന്‍ രാഷ്‌ട്രീയക്കാരനുമായ അലക്‌സാണ്ടര്‍ സുക്കോവിന്റെ മുന്‍ ഭാര്യയാണ് എലീന സുക്കോവ. സംരംഭകയും സാമൂഹ്യപ്രവര്‍ത്തകയുമായ ദാഷ സുക്കോവ് ഇവരുടെ മകളാണ്.
1956ല്‍ ഓസ്‌ട്രേലിയന്‍ ഫ്‌ലൈറ്റ് അറ്റന്‍ഡന്റായ പട്രീഷ്യ ബുക്കറുമായായിരുന്നു റൂപര്‍ട്ട് മര്‍ഡോക്കിന്റെ ആദ്യ വിവാഹം കഴിച്ചത്. 1960ല്‍ ഇരുവരും വിവാഹമോചിതരായി. പിന്നീട് മാധ്യമപ്രവര്‍ത്തകയായ അന്ന ടൊര്‍വിനെ വിവാഹം കഴിച്ചു. 1999ല്‍ വിവാഹമോചനം നേടി. പിന്നീട് വെന്‍ഡി ഡെംഗിനെ വിവാഹം കഴിച്ചു. 2013ല്‍ ഇവരുമായും വേര്‍ പിരിഞ്ഞു. 2016ല്‍ മോഡല്‍ ജെറി ഹാളിനെയാണ് വിവാഹം കഴിച്ചത്. 2021ല്‍ ഈ ബന്ധവും വേര്‍പിരിഞ്ഞു. മര്‍ഡോക്കിന് ആറ് മക്കളുണ്ട്.
പിതാവ് നടത്തിയിരുന്ന പത്രം 1952ല്‍ മര്‍ഡോക്കിന് ലഭിച്ചു. 1969 ല്‍ യുകെ പത്രങ്ങളായ ന്യൂസ് ഓഫ് ദി വേള്‍ഡ്, ദി സണ്‍ എന്നിവ അദ്ദേഹം ഏറ്റെടുത്തു. പിന്നീട് ന്യൂയോര്‍ക്ക് പോസ്റ്റ്, യുഎസിലെ വാള്‍ സ്ട്രീറ്റ് ജേണല്‍ തുടങ്ങിയ മാധ്യമങ്ങള്‍ കൂടി ഏറ്റെടുത്തതോടെ മാധ്യമ വ്യവസായി എന്ന നിലയില്‍ മര്‍ഡോക്കിന്റെ സാമ്രാജ്യം വളര്‍ന്ന് പന്തലിക്കുകയായിരുന്നു. ഫോര്‍ബ്‌സ് പ്രകാരം മര്‍ഡോക്കിന് 20 ബില്യണ്‍ ഡോളറിലധികം ആസ്തിയുണ്ട്.
