തിരുവനന്തപുരം: ഗുണ്ടാ നേതാവ് തമ്മനം ഫൈസലിന്റെ വീട്ടിലെ വിരുന്നില് ഡിവൈഎസ്പി പങ്കെടുത്ത സംഭവത്തില് സസ്പെന്ഷന് നടപടി ശ്രദ്ധ തിരിക്കാന് മാത്രം. ഗുണ്ടകളുമായുള്ള പോലീസ് ബന്ധം കൂടുതല് ചര്ച്ചയാകാതിരിക്കാനാണ് പോലീസുകാര്ക്കെതിരെയുള്ള സസ്പെന്ഷന് നാടകം.
നേരത്തേ തന്നെ ഗുണ്ടകളും മണല്, ക്വാറി മാഫിയകളുമായി ബന്ധമുള്ള പോലീസുകാരുടെ ലിസ്റ്റ് ആഭ്യന്തര വകുപ്പിന്റെ കൈയിലുണ്ട്. എന്നാല് കാര്യമായ നടപടിയൊന്നും ആഭ്യന്തര വകുപ്പ് കൈക്കൊണ്ടില്ല. പകരം ഗുണ്ടകളെയും കൂട്ടാളികളായ പോലീസുകാരെയും സംരക്ഷിക്കുകയായിരുന്നു. വിരുന്നിനു കൊണ്ടുപോയത് ഡിവൈഎസ്പിയെന്നാണ് പോലീസുകാര് പറയുന്നത്. എന്നാല് സിനിമാ നടനെ പരിചയപ്പെടുത്താമെന്നു പറഞ്ഞാണ് വിരുന്നിനു കൊണ്ടുപോയതെന്നാണ് ഡിവൈഎസ്പിയുടെ മറുപടി. കൂടുതല് ചര്ച്ചകളുണ്ടാകാതിരിക്കാനാണ് ആഭ്യന്തര അന്വേഷണം പ്രഖ്യാപിച്ചത്.
ഓപ്പറേഷന് ആഗ് എന്നു പേരിട്ട് സംസ്ഥാനത്തുടനീളം ഗുണ്ടാ ലിസ്റ്റില്പ്പെട്ടവരുടെ വീടുകളില് പോലീസ് പരിശോധിക്കുന്നതിനിടെയാണ് ഗുണ്ടകളുടെ വിരുന്നില് പോലീസുകാര് തന്നെ പങ്കെടുക്കുന്നത്. ഇതിന്റെ നാണക്കേടു മറയ്ക്കാനും കൂടിയാണ് സസ്പെന്ഷന് പ്രഹസനം.
