ന്യൂദൽഹി : ശനിയാഴ്ച രാത്രി ദൽഹിയിലെ വിവേക് വിഹാർ ഏരിയയിലെ കുട്ടികളുടെ ആശുപത്രിയിലുണ്ടായ വൻ തീപിടിത്തത്തിൽ ഏഴ് നവജാത ശിശുക്കൾ മരിക്കുകയും 11 പേരെ രക്ഷപ്പെടുത്തുകയും ചെയ്തു. ശനിയാഴ്ച രാത്രി 11.30 ഓടെ വിവേക് വിഹാർ പോലീസ് സ്റ്റേഷനിൽ ന്യൂ ബോൺ ബേബി കെയർ ഹോസ്പിറ്റലിലും അടുത്തുള്ള കെട്ടിടത്തിലും തീപിടുത്തം ഉണ്ടായതായി പിസിആർ കോൾ ലഭിച്ചത്.
തുടർന്ന് ഉന്നത പോലീസ് ഉദ്യോഗസ്ഥർ സ്ഥലത്തെത്തി, ഡിഎഫ്എസ് ഒമ്പത് ഫയർ ടെൻഡറുകൾ അയച്ചു. രക്ഷാപ്രവർത്തനം തുടരുകയാണെന്ന് ഡൽഹി ഫയർ സർവീസസ് (ഡിഎഫ്എസ്) അറിയിച്ചു.
എന്നാൽ തീപിടിത്തത്തിന്റെ കാരണം ഇതുവരെ കണ്ടെത്താനായിട്ടില്ലെന്ന് ഡിഎഫ്എസ് മേധാവി അതുൽ ഗാർഗ് പറഞ്ഞു. അതേസമയം, രക്ഷപ്പെടുത്തിയ 11 നവജാത ശിശുക്കളെ തുടർ ചികിത്സയ്‌ക്കായി ഈസ്റ്റ് ദൽഹി അഡ്വാൻസ് എൻഐസിയു ആശുപത്രിയിലേക്ക് മാറ്റി.
രണ്ട് കെട്ടിടങ്ങളെയാണ് തീപിടുത്തം ബാധിച്ചതെന്ന് ഫയർ ഓഫീസർ രാജേഷ് എഎൻഐ വാർത്താ ഏജൻസിയോട് പറഞ്ഞു. ഒന്ന് ആശുപത്രി കെട്ടിടവും മറ്റൊന്ന് ഒരു റെസിഡൻഷ്യൽ കെട്ടിടത്തിന്റെ രണ്ട് നിലകളുമാണ്. കുറഞ്ഞത് 11-12 പേരെ രക്ഷപ്പെടുത്തി. അവരെ ആശുപത്രിയിൽ പ്രവേശിപ്പിച്ചു. കൂടുതൽ വിശദാംശങ്ങൾ പിന്നീട് പങ്കിടുമെന്ന് അദ്ദേഹം പറഞ്ഞു.
ഗുജറാത്തിലെ രാജ്‌കോട്ടിൽ ഗെയിമിംഗ് സോണിൽ വൻ തീപിടിത്തമുണ്ടായതിനെ തുടർന്ന് ഒമ്പത് കുട്ടികളടക്കം 24 പേരുടെ ജീവൻ അപഹരിച്ച വൻ തീപിടുത്തത്തിന്റെ പിന്നാലെയാണ് ഈ ദാരുണ സംഭവം.
