ലിറ്റില് ഹാര്ട്സ് എന്ന പുതിയ സിനിമയുടെ പ്രമോഷന് പരിപാടിക്കിടെ നടത്തിയ ചില പരാമര്ശങ്ങളില് വ്യക്തത വരുത്തി നടന് ഷെയ്ന് നിഗം. വിഡിയോ ദൃശ്യത്തിലെ മുഴുവന് ഭാഗവും കാണാതെ, അതിനെ തെറ്റായി പലരും വ്യാഖ്യാനിക്കുന്നത് ശ്രദ്ധയില് പെട്ടെന്നും മതവിദ്വേഷത്തിന് അവസരം കാത്തു നിന്നവര്ക്ക് പാത്രമാകാന് തന്റെ വാക്കുകള് കാരണമായെന്നതു കൊണ്ടാണ് ഇക്കാര്യത്തില് വ്യക്തത വരുത്തുന്നതെന്നും നടന് പറഞ്ഞു.
‘കഴിഞ്ഞ ദിവസം നിങ്ങള് കണ്ട വീഡിയോ ദൃശ്യത്തിലെ മുഴുവന് ഭാഗവും കാണാതെ, അതിനെ തെറ്റായി പലരും വ്യാഖ്യാനിക്കുന്നത് ശ്രദ്ധയില് പെട്ടത് തികച്ചും ഖേദകരമാണ്. മഹിയും ഉണ്ണി ചേട്ടനും എല്ലാവരും സുഹൃത്തുക്കള് ആണെന്നിരിക്കെ തെറ്റായ ദിശയിലേക്ക് ചിലര് പറഞ്ഞതിനെ കൊണ്ട് എത്തിക്കുകയും ചെയ്തു. പിന്നെ അവസരം മുതലെടുത്ത് മതവിദ്വേഷത്തിന് അവസരം കാത്തു നിന്നവര്ക്ക് പാത്രമാകാന് എന്റെ വാക്കുകള് കാരണമായി എന്നൊരു ഒറ്റ കാരണം കൊണ്ടാണ് ഇന്നിവിടെ ഇത് പങ്കുവെക്കുന്നത്. അവരെ പ്രബുദ്ധരായ മലയാളികള് അവജ്ഞയോടെ തള്ളും… തള്ളണം… ഇത് ഷെയിന് നിഗത്തിന്റെയും ഉണ്ണി മുകുന്ദന്റെയും മമ്മൂട്ടിയുടെയും മോഹന്ലാലിന്റെയും സുരേഷ്ഗോപിയുടെയും ഒക്കെ നാട് തന്നെയാണ്…’, ഷെയ്ന് നിഗം സോഷ്യല് മീഡിയയിലൂടെ പറയുന്നു.
ഉണ്ണി മുകുന്ദന് ആരാധകരുടെ കൂട്ടായ്മയെക്കുറിച്ചു ഷെയ്ന് നടത്തിയ ചില പരാമര്ശങ്ങളാണ് വൈറലാകുകയും പിന്നീട് വിവാദമാകുകയും ചെയ്തത്.
