തൃപ്രയാര്‍: നാട്ടികയില്‍ ആര്‍എസ്എസ് പ്രവര്‍ത്തകന്റെ വീടിന് നേരെ ആക്രമണം. നാട്ടിക മൂന്നാം വാര്‍ഡില്‍ താമസിക്കുന്ന ആര്‍എസ്എസ് ഖണ്ഡ് ശാരീരിക് പ്രമുഖ് ഷെറിന്‍ തിലകന്റെ വീടിന് നേരെയാണ് സാമൂഹ്യവിരുദ്ധര്‍ അക്രമം നടത്തിയത്. ആക്രമികള്‍ വീടിന്റെ ജനല്‍ചില്ലുകള്‍ തകര്‍ക്കുകയും, വീട്ടുവളപ്പില്‍ പാര്‍ക്ക് ചെയ്തിരുന്ന കാറിന്റെ ചില്ലുകള്‍ തകര്‍ക്കുകയും ചെയ്തു.
തിങ്കളാഴ്ച രാത്രിയാണ് സംഭവം നടന്നത്. ഇരുട്ടിന്റെ മറവില്‍ മഴയത്ത് എത്തിയ ഒരു കൂട്ടം സാമൂഹ്യവിരുദ്ധര്‍ ഷെറിന്‍ തിലകിന്റെ വീടിനു നേരെ ആക്രമം അഴിച്ചുവിടുകയായിരുന്നു. ശബ്ദം കേട്ട് ഷെറിനും കുടുംബവും, സമീപവാസികളും പുറത്തേക്കിറങ്ങുമ്പോഴേക്കും അക്രമികള്‍ ഓടിരക്ഷപെട്ടിരുന്നു. അക്രമങ്ങള്‍ക്ക് പിന്നിലുള്ളവരെ കണ്ടെത്തണമെന്ന് ആവശ്യപ്പെട്ടുകൊണ്ട് ഷെറിന്‍ വലപ്പാട് പോലീസില്‍ പരാതി നല്‍കി.
ലോക്‌സഭാ ഇലക്ഷന്‍ കാലയളവില്‍ തന്നെ നാട്ടികയില്‍ രാത്രിയുടെ മറവില്‍ ചില സ്ഥലങ്ങളില്‍ ബിജെപി സ്ഥാനാര്‍ഥിയുടെ ചുവരെഴുത്തുകള്‍ മായ്‌ക്കുകയും, ഫ്‌ലക്‌സുകള്‍ നശിപ്പിക്കുകയും ചെയ്തിരുന്നു. ഇതിനെല്ലാം ശേഷമാണ് ആര്‍എസ്എസ് പ്രവര്‍ത്തകന്റെ വീടിന് നേരെ ആക്രമണം നടന്നിരിക്കുന്നത്.
