തിരുവനന്തപുരം: സ്മാര്ട്ട് സിറ്റി പദ്ധതി പ്രകാരം നഗരത്തില് നിര്മാണം പുരോഗമിക്കുന്ന റോഡുകള് ജൂണ് 15നകം സഞ്ചാരയോഗ്യമാക്കുമെന്നു മന്ത്രി വി. ശിവന്കുട്ടിയുടെ അധ്യക്ഷതയില് ചേര്ന്ന ഉദ്യോഗസ്ഥതല യോഗത്തില് തീരുമാനം. മൂന്നൂ ദിവസമായി പെയ്യുന്ന കനത്ത മഴയെത്തുടര്ന്നു നഗരത്തിന്റെ ചില മേഖലകളിലുണ്ടായിട്ടുള്ള വെള്ളക്കെട്ട് നിവാരണം രണ്ടു ദിവസത്തിനകം പൂര്ത്തിയാക്കാനും പിഡബ്ല്യുഡി റസ്റ്റ് ഹൗസില് ചേര്ന്ന യോഗത്തില് തീരുമാനമായി.
നഗരത്തിലെ വെള്ളക്കെട്ട് നിവാരണവുമായി ബന്ധപ്പെട്ടു നടത്തുന്ന പ്രവര്ത്തനങ്ങള് സംബന്ധിച്ചു ബന്ധപ്പെട്ട വകുപ്പുകള് കളക്ടര്ക്കു റിപ്പോര്ട്ട് നല്കണം. കളക്ടര് ഇതു സംബന്ധിച്ച റിപ്പോര്ട്ട് സര്ക്കാരിനു കൈമാറണം. ഓരോ ദിവസവും വൈകിട്ട് ബന്ധപ്പെട്ട വകുപ്പുകളിലെ ഉദ്യോഗസ്ഥരുടെ യോഗം ചേര്ന്നു കളക്ടര് പ്രവര്ത്തനങ്ങള് വിലയിരുത്തണം. മണ്സൂണ് കാലത്ത് നഗരത്തിലും ജില്ലയുടെ മറ്റു ഭാഗങ്ങളിലുമുണ്ടാകുന്ന വെള്ളക്കെട്ട് അടക്കമുള്ള കെടുതികള് അടിയന്തരമായി പരിഹരിക്കുന്നതിന് ഓരോ പ്രദേശങ്ങളുടേയും ചുമതലയ്ക്ക് ഡെപ്യൂട്ടി കളക്ടര്മാരെ ചുമതലപ്പെടുത്തണം. ഇവര് കോര്പ്പറേഷനുമായും സര്ക്കാര് സംവിധാനങ്ങളുമായും ചേര്ന്നു പ്രവര്ത്തനങ്ങള് ഏകോപിപ്പിക്കണമെന്നും മന്ത്രി യോഗത്തില് നിര്ദേശിച്ചു.
സ്മാര്ട്ട് സിറ്റി പദ്ധതിയുടെ ഭാഗമായി 10 റോഡുകളിലാണു നിലവില് നിര്മാണ പ്രവര്ത്തനങ്ങള് നടക്കുന്നത്. റോഡ് നിര്മാണത്തിനായി കുഴിയെടുത്തു വെള്ളക്കെട്ടുണ്ടായ ഭാഗങ്ങളില് മുന്നറിയിപ്പ് ബോര്ഡുകള് സ്ഥാപിക്കണം. മൂന്നു ദിവസമായി പെയ്യുന്ന കനത്ത മഴമൂലം നഗരത്തില് വെള്ളക്കെട്ടുണ്ടായ പ്രദേശങ്ങളില് പൊതുമരാമത്ത് വകുപ്പ്, വാട്ടര് അതോറിറ്റി, മേജര് മൈനര് ഇറിഗേഷന് വകുപ്പുകള്, കോര്പ്പറേഷന് എന്നിവര് യുദ്ധകാലാടിസ്ഥാനത്തില് യോജിച്ചുള്ള പ്രവര്ത്തനം നടത്തി മേയ് 23 നകം പ്രശ്നപരിഹാരമുണ്ടാക്കണമെന്നും യോഗത്തില് മന്ത്രി നിര്ദ്ദേശിച്ചു.
മേയര് ആര്യ രാജേന്ദ്രന്, എംഎല്എമാരായ കടകംപള്ളി സുരേന്ദ്രന്, ആന്റണി രാജു, വി.കെ. പ്രശാന്ത്, കളക്ടര് ജെറോമിക് ജോര്ജ്, എഡിഎം പ്രേംജി സി., സബ് കളക്ടര് ഡോ. അശ്വതി ശ്രീനിവാസ് തുടങ്ങിയവരും പങ്കെടുത്തു.
