വെള്ളറട: ഒറ്റശേഖരമംഗലം മണ്ഡപത്തിന്കടവില് പ്രദേശവാസിയായ വനിത നടത്തുന്ന സ്ഥാപനത്തില് കയറി അതിക്രമം നടത്തിയ പ്രതി പിടിയിലായി. മലയിന്കീഴ് ഇരട്ട കലൂങ്ക് സ്വദേശി അഖിലിനെയാണ് പിടികൂടിയത്.
സ്ഥാപനത്തില് എത്തുകയും ചില്ലറ തരുമോ എന്ന് ചോദിച്ച് സ്ഥാപനത്തിനുള്ളിലേക്ക് കയറുകയും ചെയ്ത യുവാവ് മാല പൊട്ടിക്കാനുള്ള ശ്രമമാണെന്നാണ് കടയുടമ ആദ്യം കരുതിയത്. പിന്നോട്ട് മാറാന് തുടങ്ങിയ വനിതയെ ഇയാള് കടന്നുപിടിക്കുകയും ഭിത്തിയോട് ചേര്ത്ത് നിര്ത്തുകയുമായിരുന്നു.
ഇവര് ബഹളം വയ്ക്കുകയും കുതറിമാറുകയും ചെയ്തതോടെ പ്രതി ഒന്നും സംഭവിക്കാത്തത് പോലെ ഇറങ്ങിനടന്നു. സമനില വീണ്ടെടുത്ത് പുറത്തിറങ്ങിയ വനിത സമീപത്തുണ്ടായിരുന്നവരോടെല്ലാം കാര്യം പറഞ്ഞു. തുടര്ന്ന് അടുത്തുള്ള സ്ഥാപനങ്ങളിലുള്ളവരും നാട്ടുകാരുമെല്ലാം ചേര്ന്ന് ഇയാളെ പിന്തുടര്ന്ന് പിടികൂടുകയായിരുന്നു.
ഈ സമയം ഇതുവഴി എത്തിയ മഫ്റ്റി പോലീസ് ഉദ്യോഗസ്ഥര് ഇയാളെ പിടികൂടി കാട്ടാക്കട സ്റ്റേഷനിലെത്തിച്ചു. കടയുടമയില് നിന്ന് മൊഴി രേഖപ്പെടുത്തി പോലീസ് കേസെടുത്തു. സംഭവത്തിന്റെ സിസിടിവി ദൃശ്യവും പോലീസ് ശേഖരിച്ചു.
