ന്യൂഡല്‍ഹി: സി.പി.എം. എംഎല്‍എയും മുന്‍ ചീഫ് ജസ്റ്റിസ് കെജി ബാലകൃഷ്ണന്റെ മരുമകനുമായ പി വി ശ്രീനിജിന്‍ നല്‍കിയ കേസില്‍ മറുനാടന്‍ മലയാളി യൂട്യൂബ് ചാനലിന്റെ എഡിറ്ററും ഉടമയുമായ ഷാജന്‍ സ്‌കറിയ നല്‍കിയ മുന്‍കൂര്‍ ജാമ്യഹര്‍ജി സുപ്രീംകോടതി വിധി പറയാന്‍ മാറ്റി. അറസ്റ്റ് ചെയ്യാന്‍ അനുമതി തേടി കേരള സര്‍ക്കാരാണ് സുപ്രീംകോടതിയെ സമീപിച്ചത്. വ്യാജ വാര്‍ത്തകള്‍ നല്‍കി അധിക്ഷേപിക്കുന്നുവെന്ന് എംഎല്‍എയും, വാര്‍ത്തകളിലൂടെ കേരളത്തിന്‌റെ അജന്‍ഡ നിശ്ചയിക്കാന്‍ ഷാജന്‍ ശ്രമിക്കുന്നുവെന്ന് സര്‍ക്കാരും കോടതിയില്‍ വാദിച്ചു.
എംഎല്‍എയ്‌ക്കും ഭാര്യാപിതാവിനുമെതിരെ തെറ്റായ ആരോപണങ്ങള്‍ ഉന്നയിക്കുന്ന വാര്‍ത്താ വീഡിയോയുടെ പേരില്‍ 1989-ലെ പട്ടികജാതി-പട്ടികവര്‍ഗ (അതിക്രമങ്ങള്‍ തടയല്‍) ആക്ട് പ്രകാരമാണ് കേരള പോലീസ് കുറ്റം ചുമത്തിയത്. വിചാരണക്കോടതിയും ഹൈക്കോടതിയും മുന്‍കൂര്‍ ജാമ്യം നിഷേധിച്ചിരുന്നു. എന്നാല്‍ 2023 ജൂലൈയില്‍ സുപ്രീം കോടതി അദ്ദേഹത്തിന്റെ അറസ്റ്റ് സ്റ്റേ ചെയ്തു. ഇതു നീക്കണമെന്നാവശ്യപ്പെട്ടാണ് സര്‍ക്കാര്‍ സുപ്രീംകോടതിയെ സമീപിച്ചത്.
