കോഴിക്കോട്: കെ കെ ശൈലജയ്‌ക്കും മഞ്ജു വാര്യര്‍ക്കുമെതിരെ സ്ത്രീവിരുദ്ധ പരാമര്‍ശം നടത്തിയ ആര്‍ എം പി നേതാവ് കെ എസ് ഹരിഹരന്റെ വീടിന് നേരെ ആക്രമണം.സ്‌കൂട്ടറിലെത്തിയ രണ്ടംഗ സംഘം വീടിന് നേരെ സ്‌ഫോടകവസ്തു എറിഞ്ഞു. സ്‌ഫോടകവസ്തു വീടിന് ചുറ്റുമതിലില്‍ തട്ടി പൊട്ടിയതിനാല്‍ അപകടം ഒഴിവായി.
വൈകിട്ട് മുതല്‍ ഒരു സംഘം വീടിന് പരിസരത്ത് കറങ്ങിയിരുന്നതായി ഹരിഹരന്‍ വ്യക്തമാക്കി. ഞായറാഴ്ച രാത്രി 8.15നായിരുന്നു സംഭവം. സ്‌ഫോടക വസ്തുവിന്റെ അവശിഷ്ടങ്ങള്‍ എറിഞ്ഞവര്‍ തന്നെ പിന്നീട് എത്തി വാരികൊണ്ട് പോയെന്നും ഹരിഹരന്‍ വെളിപ്പെടുത്തി.
യുഡിഎഫും ആര്‍എംപിയും സംഘടിപ്പിച്ച പരിപാടിയില്‍ കെ എസ് ഹരിഹരന്‍ നടത്തിയ സ്ത്രീവിരുദ്ധ പരാമര്‍ശത്തിനെതിരെ ഡി ജി പിക്ക് ഡിവൈഎഫ്‌ഐ പരാതി നല്‍കിയിരുന്നു.ലോക്സഭാ തിരഞ്ഞെടുപ്പിലെ പ്രചാരണത്തിനിടെ വടകര മണ്ഡലത്തില്‍ ഉണ്ടായ അശ്ലീല വിഡിയോ വിവാദത്തെക്കുറിച്ച് പരാമര്‍ശിക്കുന്നതിനിടെയായിരുന്നു ഹരിഹരന്‍ വിവാദ പരാമര്‍ശം നടത്തിയത്.
സ്ത്രീവിരുദ്ധ പരാമര്‍ശം വന്‍ചര്‍ച്ചയായതോടെ ഹരിഹരന്‍ ഫേസ്ബുക്ക് പേജില്‍ ഖേദം പ്രകടിപ്പിച്ചിരുന്നു.
