ന്യൂദല്ഹി: ഖത്തറിനും കുവൈറ്റിനുമെതിരായ ഫിഫ ലോകകപ്പ് യോഗ്യതതിയലെ രണ്ടാം റൗണ്ട് പ്രാഥമിക പോരാട്ടത്തിനുള്ള ഭാരതത്തിന്റെ സാധ്യതാ ടീമിനെ പ്രഖ്യാപിച്ചു. പരിശീലകന് ഇഗോര് സ്റ്റിമാച്ച് 26 അംഗ സാധ്യതാ ടീമിനെ തെരഞ്ഞെടുത്തയാണ് ഇന്നലെ അറിയിച്ചത്. ഇവരുമായി അടുത്ത വെള്ളിയാഴ്ച ഭുവനേശ്വറില് പരിശീലന ക്യാമ്പ് തുടങ്ങും.
ഐ ലീഗില് നിന്ന് നാല് താരങ്ങളെ പുതുതായി ഉള്പ്പെടുത്തിയിട്ടുണ്ട്. റിയല് കശ്മീരിന്റെ മുഹമ്മദ് ഹമ്മദ്, ഇന്റര് കാശി താരം എഡ്മണ്ട് ലാല്റിന്ദിക, ഐസ്വാള് എഫ്സിയുടെ ലാല്റിന്സ്വാലാ, മുഹമ്മദന് സ്പോര്ട്ടിങ് ക്ലബ്ബ് താരം ഡേവിഡ് ലാല്ലന്സംഗ എന്നിവരാണ് പുതുതായി ഉള്പ്പെട്ടവര്.
അടുത്ത മാസം ആറിന് കുവൈറ്റിനെതിരെ കൊല്ക്കത്തയിലാണ് ഭാരതത്തിന്റെ മത്സരം തുടര്ന്ന് 11ന് ദോഹയില് ഖത്തറിനെയും നേരിടും. ഗ്രൂപ്പ് എയില് ഉള്പ്പെട്ട ഭാരതം നിലവില് രണ്ടാം സ്ഥാനത്താണ്. പ്രാഥമിക റൗണ്ട് തീരുമ്പോള് പട്ടികയില് മുന്നിലെത്തുന്ന രണ്ട് ടീമുകള് ലോകകപ്പ് യോഗ്യതയുടെ മൂന്നാം റൗണ്ടില് പ്രവേശിക്കും. ഒപ്പം അടുത്ത എഎഫ്സി ഏഷ്യന് കപ്പിനുള്ള യോഗ്യതയും സ്വന്തമാകും. 2027ല് സൗദി അറേബ്യയിലാണ് അടുത്ത ഏഷ്യന് കപ്പ്.
