ന്യൂദല്ഹി: ലോക്സഭ തെരഞ്ഞെടുപ്പില് കോണ്ഗ്രസ് കനത്ത തിരിച്ചടിയാണ് നേരിടാന് പോകുന്നതെന്ന് അമിത് ഷാ. വോട്ടെണ്ണല് ദിവസമായ ജൂണ് നാലിന് ഭാരത് ജോഡോ യാത്രക്ക് പകരം കോണ്ഗ്രസിനെ കണ്ടെത്താനുള്ള യാത്ര നടത്തേണ്ടി വരുമെന്ന് അമിത് ഷാ പരിഹസിച്ചു. ബറേലിയിലെ തെരഞ്ഞെടുപ്പ് റാലിക്കിടെയായിരുന്നു അമിത് ഷായുടെ പ്രതികരണം.
രാഹുലും സമാജ്വാദി പാര്ട്ടി അദ്ധ്യക്ഷന് അഖിലേഷ് യാദവും അയോദ്ധ്യയിലെ പ്രാണപ്രതിഷ്ഠയില് പങ്കെടുക്കാതിരുന്നത് അവരുടെ വോട്ട് ബാങ്ക് നഷ്ടപ്പെടുമെന്ന ഭയത്താലാണെന്നും അദേഹം വിമര്ശിച്ചു. ബിജെപി ഇത്തവണ ബറേലിയിലെ സിറ്റിംഗ് എംപിയായ സന്തോഷ് ഗംഗ്വാറിനെ മത്സരിപ്പിക്കാത്തതിനുള്ള കാരണവും അദ്ദേഹം വ്യക്തമാക്കി.
