ദല്ഹി: ഐ പി എല്ലില് ദല്ഹി ക്യാപിറ്റല്സിന് വിജയം. പത്ത് റണ്സിനാണ് മുംബയ് ഇന്ത്യന്സിനെ പരാജയപ്പെടുത്തിയത്.
ആദ്യം ബാറ്റ് ചെയ്ത ദല്ഹി നാല് വിക്കറ്റ് നഷ്ടത്തില് 257 റണ്സെടുത്തു. മുംബയുടെ പോരാട്ടം ഒമ്പത് വിക്കറ്റിന് 247 റണ്സില് അവസാനിച്ചു.
ഫ്രേസര് മക്ഗുര്കിന്റെ വെടിക്കെട്ട് ബാറ്റിംഗോടെ മത്സരം തുടങ്ങിയത്. ഇരുപത്തിയേഴ് പന്തില് 11 ഫോറും ആറ് സിക്സും സഹിതം 84 റണ്സാണ് ഫ്രേസര് മക്ഗുര്ക് എടുത്തത് . അഭിഷേക് പോറല് 36 റണ്സ് നേടി. ഷായി ഹോപ്പ് 41, റിഷഭ് പന്ത് 29 എന്നിവരും നന്നായി ബാറ്റു വീശി. അവസാന ഓവറുകളില് ട്രിസ്റ്റണ് സ്റ്റബ്സിന്റെ വെടിക്കെട്ടാണ് ദല്ഹിയെ മികച്ച സ്കോറിലേക്ക് എത്തിച്ചത്. 25 പന്തില് ആറ് ഫോറും രണ്ട് സിക്സും ഉള്പ്പടെ 48 റണ്സുമായി സ്റ്റബ്സ് പുറത്താകാതെ നിന്നു.
മറുപടി ബാറ്റിംഗില് മുംബൈയും വെടിക്കെട്ട് തുടര്ന്നു. എന്നാല് വിക്കറ്റ് കൃത്യമായ ഇടവേളകളില് വീണു. ഇഷാന് കിഷന് 20, രോഹിത് ശര്മ്മ എട്ട്, സൂര്യകുമാര് യാദവ് 26 എന്നിങ്ങനെ മുംബയ്ക്ക് വേണ്ടി സ്കോര് ചെയ്തു. തിലക് വര്മ്മ 63 റണ്സുമായി മുംബൈയ്ക്ക് വിജയ പ്രതീക്ഷ ഉണര്ത്തി. തിലക് വര്മ്മ എട്ടാമനായാണ് പുറത്തായത്. ഹാര്ദ്ദിക്ക് പാണ്ഡ്യ 46, ടിം ഡേവിഡ് 37 എന്നിവരും പൊരുതിയെങ്കിലും ലക്ഷ്യത്തിലേക്കെത്താന് മുംബയ്ക്ക് കഴിഞ്ഞില്ല. ദല്ഹിക്ക് വേണ്ടി മുകേഷ് കുമാര്, റാഷിഖ് സലാം എന്നിവര് മൂന്ന് വീതം വിക്കറ്റുകള് വീഴ്ത്തി.
