കല്‍പ്പറ്റ: മുഖ്യമന്ത്രി പിണറായി വിജയനും രാഹുലും പരസ്പരം ആരോപണം ഉന്നയിക്കുന്നത് പൊറാട്ട് നാടകമാണെന്നും കേന്ദ്ര ഏജന്‍സി പിണറായി വിജയനെ അറസ്റ്റ് ചെയ്യണമെന്ന് രാഹുല്‍ ആവശ്യപ്പെടുന്നത് ആത്മാര്‍ത്ഥമായിട്ടാണെങ്കില്‍ ഇന്‍ഡി മുന്നണിയില്‍ നിന്ന് സിപിഎമ്മിനെ പുറത്താക്കണമെന്നും ബിജെപി ദേശീയ നിര്‍വാഹക സമിതി അംഗം പി.കെ. കൃഷ്ണദാസ് ആവശ്യപ്പെട്ടു. കല്‍പ്പറ്റയില്‍ മാധ്യമങ്ങളോട് സംസാരിക്കുകയായിരുന്നു അദ്ദേഹം.
മുഖ്യമന്ത്രി ഗുരുതര കുറ്റകൃത്യം ചെയ്തിട്ടുണ്ടെന്ന് ഉറപ്പിച്ച് പറയുന്ന രാഹുലിനെതിരെ പ്രതികരിക്കാന്‍ സീതാറാം യെച്ചൂരി തയാറാകുമോ. ഇത്തരത്തിലുള്ള വാക്‌പോരുകള്‍ വോട്ടര്‍മാരെ കബളിപ്പിക്കാനാണ്. വയനാട്ടില്‍ പരാജയ ഭീതിയുള്ളത് കൊണ്ടാണ് രാഹുല്‍ അമേഠിയിലും മത്സരിക്കാന്‍ തയാറാകുന്നത്. 26ന് മുമ്പ് രാഹുല്‍ ഇത് വ്യക്തമാക്കണം.
തൃശ്ശൂര്‍ പൂരത്തിനിടയുണ്ടായ സംഭവങ്ങള്‍ ഇടത് മുന്നണിയുടെ രാഷ്‌ട്രീയ നിലപാടാണ് വെളിവാക്കുന്നത്. പൂരം അട്ടിമറിക്കാനുള്ള നീക്കമാണ് നടത്തിയത്. മുമ്പ് ശബരിമലയിലും ഇടത് സര്‍ക്കാര്‍ ഇത് പരീക്ഷിച്ചതാണ്. ഇതിനെതിരെ മുഴുവന്‍ വിശ്വാസികളും ഒന്നിക്കണം എന്നും പി.കെ.കൃഷ്ണദാസ് പറഞ്ഞു.
