തൊടുപുഴ: ഇടവിട്ട് വേനല്‍മഴ എത്തുമ്പോഴും കുറയാതെ സംസ്ഥാനത്തെ താപനില. മധ്യ- വടക്കന്‍ ജില്ലകളാണ് ഏറ്റവും കൂടിയ താപനില നിലവില്‍ രേഖപ്പെടുത്തുന്നത്. കൊല്ലം, തൃശ്ശൂര്‍, പാലക്കാട് ജില്ലകളില്‍ ഉയര്‍ന്ന താപനില 39 ഡിഗ്രി സെല്‍ഷ്യസ് വരെയും കോഴിക്കോട്, കണ്ണൂര്‍ ജില്ലകളില്‍ 38 ഡിഗ്രി വരെയും ആലപ്പുഴ, പത്തനംതിട്ട, കോട്ടയം, എറണാകുളം, കാസര്‍കോട് ജില്ലകളില്‍ 37 ഡിഗ്രി വരെയും, തിരുവനന്തപുരം, മലപ്പുറം ജില്ലകളില്‍ 36 ഡിഗ്രി വരെയും ഉയരുമെന്നാണ് മുന്നറിയിപ്പ്.
ഇന്നും നാളെയും സംസ്ഥാനത്ത് വിവിധയിടങ്ങളില്‍ ഒറ്റപ്പെട്ട മഴ ലഭിക്കും. വ്യാഴം, വെള്ളി ദിവസങ്ങളില്‍ മഴ കൂടുതല്‍ ശക്തമാകും. ഈ ദിവസങ്ങളില്‍ കോഴിക്കോട്, വയനാട് ജില്ലകളില്‍ യെല്ലോ അലര്‍ട്ടുമുണ്ട്. ഒറ്റപ്പെട്ട ശക്തമായ മഴ പ്രതീക്ഷിക്കാം. അതേസമയം ഈ വര്‍ഷം കേരളത്തില്‍ കാലവര്‍ഷം പതിവിലും കൂടുമെന്നും നേരത്തെ എത്തുമെന്നും ഐഎംഡി അറിയിച്ചു.
