തിരുവനന്തപുരം:സംസ്ഥാനത്തിന് 3000 കോടി രൂപ കടമെടുക്കാന് കേന്ദ്ര സര്ക്കാര് അനുമതി നല്കി. വായ്പാ പരിധിയില് നിന്ന് 3000 കോടി രൂപ കടമെടുക്കാനാണ് മുന്കൂര് അനുമതി.കേരളം 5000 കോടി രൂപയായിരുന്നു മുന്കൂര് ആവശ്യപ്പെട്ടത്.
നേരത്തേ സംസ്ഥാനത്തിന് 5000 കോടിരൂപ നല്കാമെന്ന കേന്ദ്ര നിര്ദ്ദേശം കേരളം തള്ളിയിരുന്നു.പതിനായിരം കോടി കിട്ടണമെന്നായിരുന്നു കേരളത്തിന്റെ ആവശ്യം.സാമ്പത്തിക പ്രതിസന്ധി പരിഹരിക്കാന് കേരളത്തിന് അധിക വായ്പ വേണമെന്ന ആവശ്യത്തില് നിലപാട് സുപ്രീം കോടതിയില് വ്യക്തമാക്കിയപ്പോഴാണ് 5000 കോടി നല്കാമെന്നും അത് അടുത്ത വര്ഷത്തെ പരിധിയില് കുറവുചെയ്യുമെന്നും കേന്ദ്രം അറിയിച്ചത്. സാമ്പത്തിക പ്രതിസന്ധി പരിഹാരത്തിന് കേരളം മാര്ഗം കണ്ടെത്തണമെന്നും കേന്ദ്രം നിര്ദ്ദേശിച്ചിരുന്നു.
എന്നാല് പതിനായിരം കോടി ഉടന് കിട്ടണമെന്ന് കേരളം ആവശ്യപ്പെട്ടു.കേന്ദ്രം വാഗ്ദാനം ചെയ്ത പണം വാങ്ങിക്കൂടേ എന്ന് കോടതി കേരളത്തോട് ചോദിച്ചു. ഇതോടെ വിഷയത്തില് വിശദമായ വാദം കേള്ക്കണമെന്ന് കേരളം ആവശ്യപ്പെട്ടു. കേന്ദ്രവും ഇതേ നിലപാടെടുത്തു.
അവകാശപ്പെട്ട കേന്ദ്രഫണ്ടുകള് അനുവദിക്കണമെന്നാവശ്യപ്പെട്ടാണ് കേരളം സുപ്രീംകോടതിയെ സമീപിച്ചത്.കടുത്ത സാമ്പത്തികപ്രതിസന്ധി നേരിടുന്ന കേരളത്തിന് സാമ്പത്തിക വര്ഷാവസാനം പിടിച്ചുനില്ക്കാന് കേന്ദ്ര സര്ക്കാര് ഒറ്റത്തവണ രക്ഷാപാക്കേജ് അനുവദിക്കണമെന്നും അന്ന് സുപ്രീംകോടതി പറഞ്ഞിരുന്നു.
