ഹൈദരാബാദ്: ജൂണില്‍ നടക്കുന്ന ടി20 ലോകകപ്പിനുള്ള ഇന്ത്യന്‍ ടീമില്‍ രാജസ്ഥാന്‍ റോയല്‍സ് നായകന്‍ സഞ്ജു സാംസണും ഡല്‍ഹി ക്യാപിറ്റല്‍സ് നായകന്‍ റിഷഭ് പന്തും വേണമെന്ന് വെസ്റ്റ് ഇന്‍ഡീസ് ഇതിഹാസതാരം ബ്രയാന്‍ ലാറ. ലോകകപ്പ് ടീമില്‍ സഞ്ജുവോ റിഷഭ് പന്തോ എന്ന ചോദ്യമുദിക്കുന്നില്ലെന്നും രണ്ടുപേരെയും ഉള്‍പ്പെടുത്താവുന്നതാണെന്നും ലാറ പറഞ്ഞു.
ബാറ്റിംഗില്‍ ഇരുവരും മികച്ച പ്രകടനമാണ് ഇതുവരെ നടത്തിയത്. അസാമാന്യ പ്രതിഭയുള്ള സഞ്ജുവിന്റെ ടൈമിംഗ് അപാരമാണ്. റിഷഭ് പന്താകട്ടെ വര്‍ഷങ്ങളായി ഇന്ത്യക്കായി കളിക്കുന്ന താരവുമാണ്. അപകടത്തില്‍ പരിക്കേറ്റ് തിരിച്ചുവന്നശേഷം റിഷഭ് പന്തും ഫോമിലാണ്. എന്നെ സംബന്ധിച്ച് അവര്‍ രണ്ടുപേരുമാണ് ലോകകപ്പ് ടീമിലെ വിക്കറ്റ് കീപ്പറാവാനുള്ള മത്സരത്തില്‍ ഇപ്പോള്‍ മുന്നിലുള്ളത്. ലാറ പറഞ്ഞു
ജൂണ്‍ ഒന്നിന് ആരംഭിക്കുന്ന ടി20 ലോകകപ്പില്‍ ജൂണ്‍ അഞ്ചിന് അയര്‍ലന്‍ഡിനെതിരെ ആണ് ഇന്ത്യയുടെ ആദ്യ മത്സരം.
