പത്തനംതിട്ട: സൈന്യത്തെ അപമാനിച്ച ആന്റോ ആന്റണി എംപിക്ക് വേണ്ടി സംസാരിക്കുന്ന മുന് പ്രതിരോധ മന്ത്രി എ.കെ. ആന്റണിയോട് സഹതാപം മാത്രമെന്ന് പത്തനംതിട്ടയിലെ എന്ഡിഎ സ്ഥാനാര്ത്ഥി അനില് കെ. ആന്റണി. രാജ്യദ്രോഹ നിലപാടുള്ള ഗാന്ധി കുടുംബത്തിന് വേണ്ടി അദ്ദേഹം നിലകൊള്ളുന്നതിലും സഹതാപമാണ് ഉള്ളതെന്നും അനില് ആന്റണി പറഞ്ഞു.
പത്തനംതിട്ടയില് അനില് കെ. ആന്റണി പരാജയപ്പെടണമെന്ന എ.കെ. ആന്റണിയുടെ പരാമര്ശത്തോടു പ്രതികരിക്കുകയായിരുന്നു അദ്ദേഹം.
ലോക്സഭാ തെരഞ്ഞെടുപ്പില് പത്തനംതിട്ടയില് താന് തന്നെ ജയിക്കും. യുഡിഎഫ് സ്ഥാനാര്ത്ഥി ആന്റോ ആന്റണി വന് പരാജയം ഏറ്റുവാങ്ങും. കോണ്ഗ്രസിലുള്ളത് കാലഹരണപ്പെട്ട നേതാക്കളാണ്.
2014-ലും 2019-ലും കോണ്ഗ്രസ് ജയിക്കുമെന്ന് അച്ഛന് പറഞ്ഞിരുന്നു. എന്നിട്ടും പ്രതിപക്ഷ നേതൃസ്ഥാനത്തിന് പോലും അര്ഹതയില്ലാത്തവിധം ജനം കോണ്ഗ്രസിനെ തിരസ്കരിച്ചു. സോണിയയുടെയും രാഹുലിന്റെയും സ്വകാര്യ സ്വത്തുപോലെയാണ് ഇന്ന് കോണ്ഗ്രസ് പാര്ട്ടി. അവരുടെ പ്രൈവറ്റ് ലിമിറ്റഡ് കമ്പനിക്ക് വേണ്ടിയാണ് കോണ്ഗ്രസുകാര് ഇപ്പോള് പ്രവര്ത്തിക്കുന്നത്.
ഭാരതത്തെ കൊള്ളയടിച്ച ഗാന്ധി കുടുംബത്തിന് വേണ്ടി താന് പ്രവര്ത്തിക്കണോ? ബോഫോഴ്സ് മുതല് നാഷണല് ഹെറാള്ഡ് വരെ കൊള്ളയടിച്ചവര്ക്ക് വേണ്ടി പ്രവര്ത്തിക്കാന് തന്നെ കിട്ടില്ല. പിതാവിനോട് തനിക്ക് ബഹുമാനമുണ്ട്. പക്ഷേ എ.കെ. ആന്റണിയുടെ രാഷ്ട്രീയത്തില് തനിക്ക് വിശ്വാസമില്ലെന്നും അനില് ആന്റണി പറഞ്ഞു.
