തിരുവനന്തപുരം: കൈതപ്രം ദാമോദരന്‍ നമ്പൂതിരി രചിച്ച അഞ്ച് ഗുരുദേവ സന്ദേശ ഗാനങ്ങളുടെ പ്രകാശനം നടന്‍ മധു നിര്‍വഹിച്ചു. മുംബൈ ആസ്ഥാനമായുള്ള എയിംസ് ഗ്രൂപ്പിന്റെ സഹോദര സ്ഥാപനമായ കണ്ണൂര്‍ കലാഗുരുകുലം സ്ഥാപകന്‍ എ.കെ.പ്രദീപ് കുമാറാണ് ‘സ്‌നേഹ സൂര്യന്‍’ എന്ന ആല്‍ബംനിര്‍മിച്ചത്. ശ്രീനാരായണ വിശ്വ സാംസ്‌കാരിക ഭവന്‍ സെക്രട്ടറി സ്വാമി ശങ്കരാനന്ദ, നടന്‍ ജഗദിഷ്, ഗായിക മധുശ്രീ നാരായണന്‍, ഗായകന്‍ കലേഷ് കരുണാകരന്‍, എസ്സ്.എന്‍.ഡി.പി.യോഗം മുംബൈ താനെ യൂണിയന്‍ പ്രസിഡന്റ് എം.ബിജുകുമാര്‍ എന്നിവര്‍ സന്നിഹിതരായിരുന്നു.
മധു ബാലകൃഷ്ണന്‍, സുദീപ് കുമാര്‍, മധുശ്രീ നാരായണന്‍, ദിലിപ് കുമാര്‍, കലേഷ് കരുണാകരന്‍ എന്നിവരാണ് ഗാനങ്ങള്‍ ആലപിച്ചിരിക്കുന്നത്. എ എം ദിലീപ് കുമാര്‍ സംഗീത സംവിധാനം നിര്‍വഹിച്ച ആല്‍ബത്തിന്റെ ആഖ്യാതാവ് യതീന്ദ്രന്‍ മാഷാണ്. ആല്‍ബത്തിന്റെ സമര്‍പ്പണം ശിവഗിരി മഹാസമാധിമന്ദിരത്തില്‍ ശ്രീനാരായണ ധര്‍മ്മ സംഘം ട്രസ്റ്റ് ഖജാന്‍ജി ശാരദാനന്ദ സാമിയും അരുവിപ്പുറം മഠത്തില്‍ സെക്രട്ടറി സാന്ദ്രാനന്ദ സ്വാമിയും നടത്തി. ആല്‍ബത്തിന്റെ ആദ്യപ്രതി എസ്.എന്‍.ഡി.പി യോഗം ജനറല്‍ സെക്രട്ടറി വെള്ളാപ്പള്ളി നടേശന് കൈമാറി.
