ലഖ്‌നൗ: ഭര്‍ത്താവിനെ കൊലപ്പെടുത്തുന്നവര്‍ക്ക് 50,000 രൂപ പാരിതോഷികം പ്രഖ്യാപിച്ച് ഭാര്യ വാട്‌സ്ആപ്പില്‍ സ്റ്റാറ്റസിട്ടു. ആഗ്രയിലെ ബാഹ് ജില്ലയിലാണു സംഭവം. ഭര്‍ത്താവ് പോലീസ് സ്റ്റേഷനില്‍ പരാതി നല്കിയപ്പോഴാണ് ഇക്കാര്യം പുറത്തറിയുന്നത്. ഭാര്യയുടെ ഒരു സുഹൃത്ത് തന്നെ ഭീഷണിപ്പെടുത്തിയിരുന്നതായും ഭര്‍ത്താവ് പരാതിയില്‍ ആരോപിച്ചു.
യുവതിക്കെതിരെ കേസെടുത്തിട്ടുണ്ടെന്നും സംഭവത്തില്‍ അന്വേഷണം നടന്നുവരികയാണെന്നും ബഹ് പോലീസ് സ്‌റ്റേഷന്‍ ഇന്‍ചാര്‍ജ് ശ്യാം സിംഗ് പറഞ്ഞു. 2022ലായിരുന്നു ഇവരുടെ വിവാഹം. മധ്യപ്രദേശിലെ ഭിന്ദിലെ ഒരു ഗ്രാമത്തില്‍ നിന്നാണ് സ്ത്രീയെ വിവാഹം കഴിച്ചത്. അതികം വൈകാതെ തന്നെ അവര്‍ തര്‍ക്കങ്ങളിലും വിയോജിപ്പുകളിലും ഏര്‍പ്പെടാന്‍ തുടങ്ങി.
അഞ്ച് മാസത്തോളം അസന്തുഷ്ടമായ ദാമ്പത്യജീവിതത്തിന് ശേഷം, 2022 ഡിസംബറില്‍, യുവതി ബഹിലെ ഭര്‍ത്താവിന്റെ വീട് വിട്ട് മാതാപിതാക്കളുടെ വീട്ടിലേക്ക് മടങ്ങി. അന്നുമുതല്‍ യുവതി മാതാപിതാക്കള്‍ക്കൊപ്പമാണ് താമസമെന്നും പരാതിയില്‍ ഭര്‍ത്താവ് വ്യക്തമാക്കി. തന്നെ ഭീഷണിപ്പെടുത്തിയത് ഭാര്യയുടെ കാമുകനാണെന്നും അദേഹം സൂചിപ്പിച്ചതായി പോലീസ് പറഞ്ഞു.
