അബുദാബിയിലെ ലുലു ഹൈപ്പര് മാര്ക്കറ്റില് നിന്നും ഒന്നരക്കോടിയോളം രൂപയുമായി മുങ്ങിയ കണ്ണൂര് സ്വദേശിയായ മലയാളി യുവാവിനെ പൊലീസ് തിരയുന്നു. അബുദാബി ഖാലിദിയ മാളിലെ ലുലു ഹൈപ്പര് മാര്ക്കറ്റ് ക്യാഷ് ഓഫീസ് ഇന് ചാര്ജായി ജോലി ചെയ്തു വരികയായിരുന്ന കണ്ണൂര് നാറാത്ത് സുഹറ മന്സിലില് പൊയ്യക്കല് പുതിയ പുരയില് മുഹമ്മദ് നിയാസി (38) നെതിരെയാണ് ഒന്നര കോടിയോളം രൂപ(ആറ് ലക്ഷം ദിര്ഹം) അപഹരിച്ചതായി ലുലു ഗ്രൂപ്പ് അബുദാബി പൊലീസില് പരാതി നല്കിയത്.
മാര്ച്ച് 25ന് ഉച്ചയ്ക്കുള്ള ഡ്യൂട്ടിക്ക് ഹാജരാകേണ്ടിയിരുന്ന നിയാസിന്റെ അസാന്നിധ്യം ശ്രദ്ധയില്പ്പെട്ടതോടെയാണ് ഹൈപ്പര് മാര്ക്കറ്റ് അധികൃതര് അന്വേഷണംമാരംഭിച്ചത്. മൊബൈലില് ബന്ധപ്പെടാന് ശ്രമിച്ചെങ്കിലും അത് സ്വിച്ച്ഡ് ഓഫായിരുന്നു. തുടര്ന്ന് നടത്തിയ പരിശോധനയില് ക്യാഷ് ഓഫിസില് നിന്ന് 6 ലക്ഷം ദിര്ഹത്തിന്റെ കുറവുള്ളതായി കണ്ടെത്തി.
ക്യാഷ് ഓഫിസില് ജോലി ചെയ്യുന്നത് കൊണ്ട് നിയാസിന്റെ പാസ്പോര്ട്ട് കമ്പനിയാണ് നിയമപ്രകാരം സൂക്ഷിക്കുന്നത്. അതു കൊണ്ട് നിയാസിന് സാധാരണ രീതിയില് യുഎഇയില് നിന്ന് പുറത്ത് പോകാന് സാധിക്കില്ലെന്ന് അധികൃതര് പറഞ്ഞു. നിയാസ് കഴിഞ്ഞ 15 വര്ഷമായി ലുലു ഗ്രൂപ്പിലാണ് ജോലി ചെയ്തിരുന്നത്.
അബുദാബിയില് താമസിച്ചിരുന്ന ഭാര്യയും രണ്ടു മക്കളും പിന്നാലെ നാട്ടിലേക്ക് മുങ്ങി. എറണാകുളം വെണ്ണല ചളിക്കവട്ടം സ്വദേശിനിയാണ് ഭാര്യ. ഭാര്യയും കുട്ടികളും ആരെയും അറിയിക്കാതെ പെട്ടെന്ന് നാട്ടിലേയ്ക്ക് പോയതെന്ന് പറയുന്നു. ലുലു ഗ്രൂപ്പ് പരാതിയില് കേരള പൊലീസും അന്വേഷണം തുടങ്ങി.
