കാസർകോട്: കാസർകോട്ടെ പാലായിയിൽ ഊരുവിലക്കിയതിനെതിരേ കേസ്. വയോധികയുടെ പറമ്പിൽ നിന്ന് തെങ്ങ് പറിക്കുന്നത് സിപിഎം പ്രവർത്തകർ തടഞ്ഞതിനെ തുടർന്ന് മൂന്ന് പരാതികളാണ് നീലേശ്വരം പോലീസിന് ലഭിച്ചത്. തുടർന്ന് രണ്ട് സിപിഎം ബ്രാഞ്ച് അംഗങ്ങൾ ഉൾപ്പെടെ ഒമ്പത് പേർക്കെതിരേ കേസെടുക്കുകയായിരുന്നു.
പറമ്പില് നിന്ന് തേങ്ങയിടുന്നത് സിപിഎം പ്രവര്ത്തകര് തടഞ്ഞെന്നാണ് പരാതിയില് പറയുന്നത്. ശനിയാഴ്ച തെങ്ങില് കയറാനെത്തിയ തൊഴിലാളിയെ തടഞ്ഞതായും പറയുന്നു. സ്ഥലം ഉടമ എം.കെ. രാധയുടെ കൊച്ചുമകള് അനന്യയുടെ പരാതിയില് സിപിഎം പ്രവര്ത്തകരായ വി.വി ഉദയകുമാര്, കെ.പത്മനാഭന് അടക്കം നാല് പേര്ക്കെതിരെയും തേങ്ങ ഇടാനെത്തിയ തൊഴിലാളി പടന്നക്കാട്ടെ ഷാജിയുടെ പരാതിയില് കെ കുഞ്ഞമ്പു, വി.വി ഉദയകുമാര് അടക്കം നാല് പേര്ക്കെതിരെയുമാണ് കേസെടുത്തത്. പാലായിലെ ലസിതയുടെ പരാതിയില് പടന്നക്കാട്ടെ ഷാജിയുടെ പേരിലും കേസെടുത്തു.
കുഞ്ഞമ്പുവും ഉദയകുമാറും ചേര്ന്ന് കയ്യേറ്റം ചെയ്തെന്നും ഭീഷണിപ്പെടുത്തിയെന്നുമാണ് ഷാജിയുടെ പരാതി. ഉദയകുമാറും പദ്മനാഭനും മറ്റു രണ്ടുപേരും ചേര്ന്ന് ഭീഷണിപ്പെടുത്തിയെന്നും ചീത്തവിളിച്ചെന്നുമാണ് അനന്യ പരാതി നല്കിയത്. ഷാജി അസഭ്യം പറയുകയും ഭീഷണിപ്പെടുത്തുകയും ചെയ്തുവെന്ന് ലസിതയുടെ പരാതിയില് പറയുന്നു.
പാലായി റഗുലേറ്റർ കം ബ്രിഡ്ജ് നിർമാണവുമായി ബന്ധപ്പെട്ട് 2016 മുതൽ പ്രദേശം സംഘർഷാവസ്ഥയിലാണ്. സമീപത്തെ റോഡ് നിർമാണത്തിന് സ്ഥലം വിട്ടുനൽകാത്തതിനാൽ നിയമപരമായ കേസുകൾ നിലനിൽക്കുന്നുണ്ട്.
