ഇ-സിം ഉപയോക്താക്കൾക്ക് മുന്നറിയിപ്പുമായി സൈബർ സുരക്ഷാ വിദഗ്ധർ. സാങ്കേതിക വിദ്യയുടെ പുരോഗതി ഹാക്കർമാർ ദുരുപയോഗം ചെയ്യുന്നതായാണ് കണ്ടെത്തൽ. ഉപയോക്താക്കളുടെ ഡാറ്റയും പണവും കൈക്കലാക്കുന്നതിന് ഹാക്കർമാർ ഇ-സിം പ്രൊഫൈലുകൾ ഉപയോഗിക്കുന്നുവെന്നാണ് പുറത്തു വരുന്ന റിപ്പോർട്ടുകൾ.
പഴയ ഫിസിക്കൽ സിം കാർഡ് സങ്കൽപ്പത്തെ മാറ്റി നിർത്തി സാങ്കേതിക വിദ്യയുടെ പുതിയ ഭാവമാണ് ഇലക്ട്രോണിക് സിം അഥവാ ഇ-സിം കാർഡ്. പുതിയ കണക്ഷനെടുക്കുന്നതിന് സിം കാർഡ് വാങ്ങേണ്ടതില്ല എന്നതാണ് ഇ-സിം ജനപ്രിയതിന് പിന്നിലെ കാരണം. ഓരോ ഫോണിലും ഫിസിക്കൽ സിമ്മിന് പകരം പുതിയ ഇലക്ട്രോണിക് ചിപ്പ് അഥവാ എംബെഡ്ഡഡ് സിം ഉണ്ടാകും. ടെലികോം കമ്പനികൾക്ക് ദൂരെ നിന്ന് ഇ-സിം പ്രോഗ്രാം ചെയ്യുന്നതിനും ഡീ ആക്ടിവേറ്റ് ചെയ്യുന്നതിനും ഡിലീറ്റ് ചെയ്യുന്നതിനും ഇ-സിം കണക്ഷൻ മറ്റൊരു ഡിവൈസിലേക്ക് മാറ്റുന്നതിനും സാധിക്കും. ഇത്തരം സാധ്യതകളാണ് ഹാക്കർമാർ ദുരുപയോഗം ചെയ്യുന്നത്.
ഉപയോക്താക്കളുടെ ഫോണിലെ ഇ-സിം പ്രൊഫൈൽ എടുത്ത് ഹാക്കർമാർ സ്വന്തം ഫോണിലേക്ക് മാറ്റുകയും മൊബൈൽ നമ്പർ ഉപയോഗിച്ച് സ്വകാര്യ വിവരങ്ങൾ ചോർത്തുകയും ചെയ്യുന്നു. കഴിഞ്ഞ വർഷം അവസാനം മുതൽ ഇത്തരം ശ്രമങ്ങൾ നടക്കുന്നുവെന്ന് എറ്എസിസിടി റിപ്പോർട്ട് ചെയ്തിട്ടുണ്ട്. ഓൺലൈൻ അക്കൗണ്ടുകളുടെ വിവിധ സുരക്ഷാ സംവിധാനങ്ങൾ മൊബൈൽ നമ്പറുമായി ബന്ധിപ്പിച്ചിട്ടുണ്ട്. നമ്പറിൽ വരുന്ന ഒടിപിയിലൂടെ അക്കൗണ്ടുകളിൽ അനധികൃതമായി കയറാനും ദുരുപയോഗം ചെയ്യാനും ഹാക്കർമാർക്ക് സാധിക്കും. ഇ-സിം കണക്ഷനിൽ ഉപയോഗിക്കുന്ന നമ്പറിൽ ബാങ്ക് അക്കൗണ്ടുകൾ, ക്ലൗഡ് പ്ലാറ്റ്ഫോമുകളുടെ അക്കൗണ്ടുകൾ എന്നിവ ബന്ധിപ്പിച്ചിട്ടുണ്ടെങ്കിൽ ടൂ ഫാക്ടർ ഒതന്റിക്കേഷൻ സെറ്റ് ചെയ്യണമെന്നും മുന്നറിയിപ്പിൽ പറയുന്നു.
പ്രതികരിക്കാൻ ഇവിടെ എഴുതുക: