തിരുവനന്തപുരം: ശതാഭിഷിക്തനായ ശ്രീകുമാരന്‍ തമ്പിക്ക് ആശംസ അര്‍പ്പിക്കാന്‍ തിരുവനന്തപുരത്തെ മൂന്നു സ്ഥാനാര്‍ത്ഥികളും എത്തി. രാജിവ് ചന്ദ്രശേഖറും ശശി തരൂരും പന്ന്യ രവീന്ദ്രനും ഒരേ സമയം എത്തിയപ്പോള്‍ അത് സ്ഥാനാര്‍ത്ഥി സംഗമം കൂടിയായി. ശ്രീചിത്രാ ഹോമില്‍ ചലച്ചിത്ര അക്കാദമിയും ശ്രീകുമാരന്‍ തമ്പി ഫൗണ്ടേഷനും ചേര്‍ന്നാണ് ശതാഭിഷേകം ആഘോഷിച്ചത്. മന്ത്രി വി ശിവന്‍ കുട്ടി, ഐ എസ് ആര്‍ ഒ ചെയര്‍മാന്‍ എസ് സോമനാഥ് , നിര്‍മ്മാതാവ് ജി സുരേഷ് കുമാര്‍ ഉള്‍പ്പെടെ പ്രമുഖര്‍ പങ്കെടുത്ത പരിപാടി.
സ്ഥാനാര്‍ത്ഥികള്‍ വന്നതോടെ ശ്രദ്ധമുഴുവന്‍ അവരിലായി. മൂവരും പരസ്പരം കൈ പിടിച്ച് സൗഹൃദം പുതുക്കുകയും പ്രസ് ഫോട്ടാഗ്രാഫര്‍മാര്‍ക്കായി നിന്നുകൊടുക്കുകയും ചെയ്തു.
അതിനിടയിലാണ് മൂവര്‍ക്കും വോട്ട് നല്‍കില്ലന്ന് ശ്രീകുമാരന്‍ തമ്പി പരസ്യമായി പറയുന്നത്. മൂന്നു സ്ഥാനാര്‍ത്ഥികളും ആദ്യം ഒന്നമ്പരന്നു. തമ്പി സാര്‍ ആയതിനാല്‍ ശേഷം പറയുന്നത് എന്ത് എന്ന ആകാംക്ഷ. ആശങ്കമാറ്റി അദ്ദേഹം തുടര്‍ന്നു, ‘ പേയാട് താമസിക്കുന്ന എനിക്ക് വോട്ട് ആറ്റിങ്ങല്‍ മണ്ഡലത്തിലാണ്’.
കേരളീയ സാംസ്‌കാരിക പരിസരത്ത് സ്വന്തം നിലപാട് പറയാന്‍ ഒരിക്കലും മടി കാട്ടിയിട്ടില്ലാത്ത ശ്രീകുമാരന്‍ തമ്പിക്ക് ആശംസ നേരാന്‍ രാഷ്ടീയ വ്യത്യാസം ഇല്ലാതെ നേതാക്കള്‍ എത്തി.
