കോഴിക്കോട്: ഐ ലീഗില് ഇന്നലെ നടന്ന നിര്ണായക പോരാട്ടത്തില് ഗോകുലം കേരള എഫ്സിക്ക് സമനില. റിയല് കശ്മീരിയുമായാണ് സമനില പിണഞ്ഞത്. മത്സരത്തില് ആദ്യം ഗോള് നേടിയത് കശ്മീര് ആണ്. പട്ടികയില് നാലാമതുള്ള ഗോകുലത്തിന് തൊട്ടുമുന്നിലാണ് റിയല് കശ്മീര്.
ഗോകുലത്തിന്റെ സ്വന്തം തട്ടകമായ കോഴിക്കോട് കോര്പ്പറേഷന് സ്റ്റേഡിയത്തില് നടന്ന ഇന്നലത്തെ കളിയില് ജയിച്ചിരുന്നെങ്കില് റിയല് കശ്മീരിനെ മറികടന്ന് മൂന്നാം സ്ഥാനത്തെത്താമായിരുന്നു.
മത്സരത്തില് ഗ്നോഹിയര് ക്രിസോയിലൂടെ കശ്മീര് 65-ാം മിനിറ്റില് ആദ്യം ഗോളിട്ടു. മൂന്ന് മിനിറ്റിനകം മാറ്റിജ ബാബോവിച് ഗോകുലത്തെ ഒപ്പമെത്തിച്ചു. ഇരുടീമുകളും ഓരോ ഗോള് നേടിയാണ് സമനില പാലിച്ചത്.
ഇതുവരെ 19 മത്സരങ്ങള് പൂര്ത്തിയാക്കിയ ഗോകുലം കേരളത്തിന് ഇനി അഞ്ച് മത്സരങ്ങള് കൂടിയാണ് ബാക്കിയുള്ളത്. ഇനിയുള്ള എല്ലാ മത്സരങ്ങളും ജയിച്ചാല് പോലും കേരളത്തിന് സീസണില് ജേതാക്കളാകുന്ന കാര്യം സംശയമാണ്. ഈ സാഹചര്യത്തില് ഗോകുലത്തെക്കാള് മുന്നിലുള്ള ടീമിനോട് സമനില വഴങ്ങിയത് തിരിച്ചടിയാകും.
