ന്യൂദല്ഹി: രാജ്യതലസ്ഥാനത്ത് കുഴല് കിണറില് വീണയാള് മരിച്ചു. പതിനാല് മണിക്കൂര് രക്ഷാദൗത്യത്തിനൊടുവില് യുവാവിനെ പുറത്തെടുത്തപ്പോഴേക്കും മരിച്ചിരുന്നു. 30 വയസ് പ്രായമുള്ള യുവാവ് ആണ് മരിച്ചതെന്നും ഇയാള് എങ്ങനെയാണ് കുഴല് കിണറില് വീണതെന്ന് അന്വേഷിക്കുമെന്നും മന്ത്രി അതിഷി മെര്ലന പറഞ്ഞു.
സംഭവത്തില് ഉത്തരവാദികളായവര്ക്കെതിരെ കര്ശന നടപടിയെടുക്കുമെന്ന് മന്ത്രി പറഞ്ഞു.ദല്ഹിയില് തുറന്നു കിടക്കുന്ന കുഴല് കിണറുകള് 48 മണിക്കൂറിനുള്ളില് അടയ്ക്കാന് അടിയന്തിര നിര്ദേശം നല്കിയെന്നും മന്ത്രി അറിയിച്ചു.
അതേസമയം, കുഴല് കിണറില് യുവാവ് വീണ സംഭവത്തില് ദുരൂഹതയുണ്ടെന്ന് പൊലീസ് പറഞ്ഞു. പൂട്ടി സീല് ചെയ്ത കുഴല് കിണര് തകര്ത്താണ് വീണ ആള് അകത്തു കടന്നത് എന്നാണ് മന്ത്രി പറഞ്ഞത്. യുവാവിനെ ആരെങ്കിലും കുഴല് കിണറിനുള്ളില് തള്ളിയിട്ടതാണോയെന്ന സംശയം ഉള്പ്പെടെ മന്ത്രി പ്രകടിപ്പിച്ചു. ഇക്കാര്യങ്ങള് ഒക്കെ പൊലീസ് അന്വേഷണത്തില് വ്യക്തമാകുമെന്ന് മന്ത്രി വ്യക്തമാക്കി. മരിച്ചയാളുടെ മറ്റു വിവരങ്ങളും ഇതുവരെ ലഭിച്ചിട്ടില്ല.
ദല്ഹി കേശോപുര് മാണ്ഡിക്ക് സമീപമുള്ള ദില്ലി ജല് ബോര്ഡിന്റെ സ്ഥലത്തെ കുഴല് കിണറിലാണ് യുവാവ് വീണത്. ഞായറാഴ്ച പുലര്ച്ചെ ഒരു മണിയോടെയാണ് അപകടം. സംഭവം നടന്ന ഉടനെ അഞ്ച് യൂണിറ്റ് അഗ്നിശമനസേനയുമായി ദല്ഹി പൊലീസ് സ്ഥലത്തെത്തി. പിന്നാലെ എന്ഡിആര്എഫ് സംഘവും സ്ഥലത്തെത്തി രക്ഷാപ്രവര്ത്തനം തുടങ്ങി. കുഴല് കിണറിന് സമാന്തരമായി മറ്റൊരു കുഴിയെടുത്ത ശേഷമാണ് യുവാവിനെ പുറത്തെടുത്തത്.
